Tempotimor (Covalima)-Ministériu Edukasaun Juventude no Desportu (MEJD) kontinua sosializa matadalan aprendijazen eskola ba uma, telemovel no liuhusi televizaun ba diretór no koordenadór ensinu báziku sira iha munisípiu Covalima.
“Programa ida ne’e atu fasilita profesór sira karik ita boot sira haluha livru iha uma bele asesu liuhusi telemovel tuir matéria ne’ebé profesór sira iha no akompaña matéria iha televizaun sira ho kanál RTTL.ep, GMN-TV no TVE-Timor, tanba ida ne’e mak ohin ita hotu tenke konsentra iha ne’e ho ekipa tékniku sira atu halo esplikasaun detallu ba profesór no profesora sira,” dehan Diretóra Jeral Planu Polítika Inkluzaun no Imprisaun, Odilia Uns Martins jornalista sira iha Salaun Eskola Sekundária Jerál Públika (ESJP) Suai. Tersa (28/09).
Diretora ne’e afirma, maske govenu liuhusi desizaun Konsellu Ministru halo suspensaun ba atividade escolar sira, maibé aprendizagem kontinua la’o husi uma.
“Iha Momentu ne’ebá ita infrenta ba moras pandemia Covid-19, ho nune’e ita-nia governu ho politikamente hodi suspende aprendisajem eskola nian, maibé prosesu aprendisajem nafatin la’o iha uma, tanba ne’e ita hamosu programa Eskola ba Uma,” katak Odelia.
Iha sorin seluk Diretór Edukasuan Municipio Covalima (EMC), Edmundo Pereira dehan, husi situasaun ne’e, halo seitór edukasaun sofre kompara ho seitór dezemvolvimentu sira seluk.
“Relasiona ho ita-nia situasaun difisíl kuaze tinan rua ona ne’ebé impaktu husi Covid-19 ne’ebé ataka iha mundu tomak inklui Timor-Leste, maka ho situasaun ida ne’e área edukasaun sofre liu kompara ho seitór dezenvolvimentu sira seluk,” dehan Edmundo.
Entretantu iha atividade sensibilizaun Eskola ba Uma ne’e partisipa husi Diretór Eskola Bázika Sentrál hamutuk na’in 20, Koordenadór Eskola 21 inklui eskola Bázika filial hamutuk 62.(*)
