Tempotimor (Covalima)-Diresaun Nasionál Transporte Terrestre (DNTT) Munisípiu Covalima kontinua fó ezame eskrita ba motorista ne’ebé trata karta kondusaun hamutuk na’in .1600.
DNTT Munisipiu Covalima, Joaquim Gusmão informa, totál kandidatus ne’ebé tuir teste ba karta kondusaun kareta ho motor antes ne’e hamutuk ema na’in 1.870, maibe kandidatus 343 tuir uluk ona ezame eskrita ba faze dahuluk nian iha loron 23 Fulan Jullu. Nune’e kontinua fali ho faze daruak mak motorista hamutuk 1600-resin.
“Kandidatus hamutuk 1870 ne’e, na’in 343 tuir ona teste eskrita iha loron 23 fulan-Jullu liu ba, ohin ita kontinua fo ezame eskrita ba kandidatus 1.600”, nia informa iha salaun uma feto “Gedung Wanita” Covalima, segunda (11/09).
Diretor ne’e esplika, matéria ne’ebé fuza ba ezame eskrita maioria kona-ba sinais tránzitu nian ho pergunta 30, tanba ne’e kada kandidatus tenke resposta pergunta ho lós minimal 20.
“Matéria ida ami fo ne’e mairoia sinain tránzitu nian de’it, ne’ebé ema na’in ida tenke hatan perguntas ho lós minimál 20, sira ne’ebé maka 10-resin de’it, entaun sira la passa hein fali oportunidade tuir mai”, Joaquim dehan.
Parte DNTT seidauk bele fo sai loron ba ezame prátika “Tama Roda”, tanba sei halo provas ba matéria ezame eskrita, ho nune’e molok anúnsiu loron ezame prátika sei hein orientasaun husi Diretór DNTT nasionál. (*)
