Tempotimor (Covalima)- Komisaun Nasionál Eleisaun (CNE) hamutuk ho autóridade lokál sira iha Munisípiu Covalima hala’o ona enkontru atu halo preparasaun ba eleisaun prezidensial tinan 2022 nian.
Vise presidente CNE, Dominggos Barreto afirma, enkontru ne’e atu defini no identifika dezafiu sira iha situasaun pandemia Covid-19 hodi buka nia solusaun.
“Objetivu ba enkontru ne’e atu tau hanoin hamutuk oinsa preparasaun ba elisaun prezidensial ba tinan 2022, tanba dadaun iha Timor-Leste ultra pasa ona pandemia Covid-19,” Dehan nia iha salaun Fimili Covalima, segunda (11/10).
Nune’e mós Administradór Covalima, Fransisco Mendonsa Tatamero hateten, enkontru ne’e tau hanoin hamutuk atu halo preparasaun ba eleisaun prezidensial ne’ebé sei akontese iha tinan 2022.
“Enkontru ida ohin tau hanoin hamutuk ho vise CNE ho entidades no autoridade lokál sira, tanba tinan ne’e eleisaun difrente ho tinan kotuk, maibe moras pandemia Covid-19 ne’e difikulta tebes ba ita, hodi tuir eleisaun ne’ebé akontese iha tinan oin mai,” Katak nia
Iha okaziaun ne’e komandante Polisia Nasionál Timor-Leste (PNTL) Covalima, Superintendente Antonio De Sa, dehan, importansia husi eleisaun mak oinsa orgaun eleitoral sira fo informasaun ne’ebé klaru kona-ba data elisaun inklui ho númeru sentru votasaun atu PNTL bele asegura fatin ka sentru de votasaun hirak sira.
“Persiza definisaun klaru kona-ba eleisaun ne’e, tanba seguransa prontu atu halo seguransa iha munispiu Covalima”, Katak Antonio
Entertantu dadaun ne’e, Sekretariadu Tékniku Administrasaun Eletoral (STAE) kontinua halo resensiamentu eleitoral no identifikasaun ba sentru no estasaun votasaun. (*)
