Tempotimor (Covalima)-Sábadu (09/10/2021) semana ne’e lia-na’in husi uma lisan Haemolin Fatisin, Uma Babulu Matai no Uma Sesurai Laduka Maneguim hala’o serimonia rituál no hisik fahi ran ba ekipamentu sira molok halo perfurasaun.
Tuir lia-na’in Bei Rai Ulun, Anacleto Amaral, katak, husi fahi nia urat ne’ebé lia-na’in husi fukun tolu haree fó sinál di’ak tanba molok atu haree manu kokorek.
“Husi urat fahi nian ne’ebé ami haree no molok atu hahú ami-nia serimónia ida ne’e atu la’o ba iha fatin ne’ebá sente di’ak tanba manu mós kokorek. Bainhira manu kokorek hatudu sinal katak ida ne’e dalan luan ba ami no loke dalan ida ba mina atu halo perfurasaun,” dehan lia-na’in Anacleto ba jornalista sira iha Suai, Sábadu (09/10).
Iha fatin hanesan Francisco Babo husi uma lisan Sesurai katak, perfurasaun molok atu la’o durante ne’e kompañia servisu hamutuk ho lia-na’in sira husi Fatisin, Maneguim no Matai.
“Ha’u hanoin perfurasaun ida ne’e atu la’o, husi kompañia serbisu hamutuk ho ami katuas adat sira liu-liu husi adat sira iha Aldeia Fatisin, Maneguim no Suku Matai ne’ebé ami hotu fiar metin katak buat ne’e sei hetan rezultadu pozitivu duni,” nia haktuir.
Iha tempu hanesan, Prezidente Autoridade Nasionál Petroleu no Minerais (ANPM), Florentino Soares Fereirra katak, ekipamentu ba perfurasaun mina matan feto maus preparadu ona.
“Hanesan ita hotu hatene katak ita sei halo perfurasaun postu Feto Maus iha Covalima ekipamentu preparadu, ne’ebé hanesan Timoroan ita-nia dever atu hakruuk fó rekoñesimentu ita-nia lulik no bei-ala sira, ita hatene katak iha hun no abut tanba ida ne’e mak ita hamutuk iha fatin ida ne’e atu halo tuir ita-nia tradisaun rituál hodi husu lisensa kbit no beran atu nune’e saida de’it ita atu buka bele hetan matak malirin bainhira serbisu la’o,” Florentino informa.
Prezidente ANPM ne’e akresenta, semana ida ka rua tan sei deside tempu fixu atu bele realiza perfurasaun.(*)
