Povu ho Povu Tulun Malu Iha Covalima

Ekipa ROCCOV entrega hela aihan bázika ba benefisiáriu iha Munisípiu Covalima, kuarta (13/10).

Tempotimor (Covalima)-Organizasaun voluntariu Rotarac Club Of Covalima (ROCCOV) ne’ebé harii husi povu bai-bain ho inisiativa fó tulun ba maluk kbi’it laek sira iha Postu Administrativu Maucatar ho Tilomar, Munisípiu Covalima.

Representatnte prezidente ROCCOV, Maria do Carmo Barros informa, fó apoiu ba maluk vuneravel sira, tanba durante situasaun pandemia covid-19 afeita tebes ba sira nia nesesidade.

Read More

 “Ami Rotarac Club Covalima hanesan organizasaun ne’ebé voluntariu ho nia objetivu atu tulun komunidade defisiente no kbi’it laek sira iha situasaun pandemia covid-19 hodi sustenta nesesidade ituan ba komunidade kbi’it laek sira tuir ROCCOV nia kbi’it ne’ebé iha, nune’e sira bele aguenta loron ida rua iha sira nia familia,” nia informa via telephone, kuarta (13/10).

Ekipa ROCCOV hala’o distribuisaun aihan bázika fós, mina bimoli, no nesesidade hanesan rinso no sasan sira seluk ne’e, durante loron rua.

“Distribuisaun aihan ohin ami hala’o iha suku Biseuk aldeia Baer benefisiriu hamutuk na’in 15 no horseik iha suku Ogues kompostu husi aldeia rua mak hanesan Soga iha benefisiáriu na’in 15 no Ogues na’in 15 hamutuk 45 benefisiárius,” Nia afirma

Benefisiáriu husi Aldeia Baer Suku Biseuk, Fernanda Monis kontenti tebes ho apoiu ne’ebé oferese husi organizasaun ROCCOV.

“Ami kontenti no agradese tebes ba oan sira, tanba oan sira nia neon diak bele hanoin kona ami nia terus hodi ajuda aihan hirak ne’e hodi uza loron ida rua tolu, maske itoan maibe folin boot tebes ba ami”, Benefisiáriu agradese

Entertantu apoiu hirak ne’ebé oferese ona ba kbi’it laek sira, mai husi mós Rotary Clubu husi Dili Lafaek (ROCDLAF). (*)

Related posts