Tempotimor (Covalima)-Kampaña vasinasaun ne’ebé vise Ministru Edukasaun Juventude no Desportu (MEJD), António Guterres hala’o iha suku Belekasak afirma katak, tempu besik labarik sira ho tiban 12 to’o 17 sei simu vasinasaun Pfizer.
“Tempu badak labarik idade 17 mai kraik sei simu hotu vasinasaun Pfizer tanba iha nasionál ami halo ona lansamentu,” dehan Vise-MEJD, António Guterres ba jornalista sira, Sesta (15/10).
Iha biban hanesan koordenadór Ensinu Báziku Filiál (EBF) Has Ain, Crispin Bere, hatete, estudante iha EBF Has-Ain hamutuk na’in 40-resin mak elizível hodi simu vasina Pfizer, tanba kompleta ona tinan ne’ebé governu define.
“Total estudante iha EBF Has-Ain hamutuk 150, maibé sira ne’ebé iha ona tinan 12 to’o 17 ema na’in 40-resin hanesan ne’e, sira prontu atu simu vasina Pfizer bainhira to’o iha fatin,” informa Koordenador EBF Has-Ain ne’e
Koordenadór ne’e afirma, durante ne’e manorin sira habelar informasaun ba estudante no inan-aman sira kona-ba oinsa oan sira atu partisipa iha vasinasaun.
“Ami habelar ona informasaun ba labarik sira katak, lakleur tan imi tinan 12 ba leten ne’e sei simu vasina, ne’ebé estudante sira durante ne’e husu bebeik katak bainhira loos mak simu vasina depois inan-aman sira mós prontu ona atu sira-nia oan atu simu vasina.(*)
