Tempotimor (Covalima) Organizasaun Kadalak Sulimutu Institutu (KSI) no Raes Hadomi Timor Oan (RHTO) fasilita treinamentu kona-ba jéneru, inkluzaun, defisiénsia no redusaun dezastre ba komunidade no juventude suku Matai.
Fasilitadór husi KSI, Pedro Brito Fernandes hateten, objetivu husi formasaun kona-ba jéneru ne’e, oinsa komunidade sira bele kompriende asuntu jéneru, tanba dala barak komunidade sira seidauk komprende fahe kna’ar iha nível uma-ka’in nian.
“Ita mai fahe informasaun ba ita-nia komunidade sira atu nune’e sira bele kompriende di’ak liután kona-ba asuntu jéneru ne’e, tanba dalabarak komunidade sira seidauk kompriende didi’ak fahe knaar ka papel iha nível uma-ka’in nian, tanba ne’e ita hasa’e komunidade sira-nia koñesimentu oinsa sira bele kompriende,” dehan Pedro ba jornalista sira iha sede Suku Matai, Sesta (15/10).
Iha fatin hanesan pontu fokál RHTO Munisipiu Covalima, Honório Gusmão katak, formasaun ne’e oinsa komunidade sira bele iha konsiénsia uza termonolójia ne’ebe dignu hodi bolu ema ho difisénsia sira, no oinsa bele salva ema ho defsiénsia sira bainhira mosu dezastre ruma.
“Matéria ami lori mak kona-ba inkluzaun defisiénsia no redusaun risku dezastre, entaun husi formasaun ne’e atu ajuda komunidade sira oinsa bele uza termonolójia ne’ebé dignu hodi bolu ema ho defisíénsia,” katak Nia.
Enkuantu formasaun ne’e realiza durante loron ida, ne’ebé hetan partisipasaun másimu husi komunidade sira iha Matai inklui ema ho defisiénsia sira. Entretantu formasaun refere sei kontinua realiza iha suku Ogues no Raimea, postu administrativu Zumalai, munisípiu Covalima.(*)
