Tempotimor (Covalima)—Reprezenta Administradór Postu Administrativu Maucatar, António Marçal katak, komunidade postu Maucatar falta de’it 15% mak seidauk simu vasina COVID-19.
“Ha’u atu relata dadus jeralmente postu administrativu Maucatar nian katak, hela de’it 15% maka seidauk vasina, 85% vasina ona hodi kompleta ba 100%,” dehan António Marçal hafoin Vise Ministru Edukasaun Juventude no Desportu (MEJD, António Guterres iha suku Belekasak, Sesta semana ne’e (15/10).
António mós enkoraja komunidade, funsionáriu no joven sira atu hakat ba sentru saúde hodi simu vasina, tanba vasina maka bele halo prevensaun ba transmisaun COVID-19.
Iha fatin hanesan sasan ba vasina COVID-19 Castro Leto katak, vasina di’ak, tanba bele kura moras seluk inklui aumenta imunidade.
“Ha’u hakarak konta ha’u-nia esperiénsia katak, antes ne’e ha’u moras tensaun, konsulta to’o ona Ospital Nasionál Guidu Valadares (ONGV) maibé la konsege kura, ha’u fila mai iha de’it uma. Ha’u-nia oan sira haruka ha’u lakohi vasina, maibé ha’u rasik deside vasina ikus mai ha’u-nia moras tensaun rekopera,” Castro konta nia esperiénsia.
Alende ne’e, responsável kampaña vasinasaun Covalima, Alípio Gusmão Lopes katak, postu Maucatar komunidade falta de’it 15% mak seidauk vasina.
“Kobertura vasinasaun Covalima okupa primeiru lugar, tanba konstribuisaun husi ita-boot sira nian. se lá hetan konstrubuisaun hodi ita-boot sira, maka ita-nia dezenvolvimentu sei la’o hakdasak no la la’o. maibé Covalima kontribui ona planu husi Governu nian. Katak, molok ne’e Covalima iha númeru segundu no terseiru, maibé ita agora kobertura vasinasaun ita okupa primeriu lugar,” tenik Alípio.
Iha sorin seluk Vise Ministru Edukasaun Juventude no Desportu (MEJD), António Guterres katak, prezensa membru governu iha Covalima, la’os atu obrigada komunidade sira vasina maibé atu fó hanoin ba komunidade hodi disemina informasaun kona-bá importánsia husi vasina.
“Komunidade aldeia Lolowa tenke hateten, ami nia aldeia lakohi moris ho COVID-19, maibé hakarak livre husi COVID-19, nune’e livre hala’o movimentu,” dehan António.
Entertantu observasaun www.tempotimor.com nota katak, husi prezensa Vise MEJD nian, komunidade aldeia Lolowa antuziasmu simu vasina ho númeru ema ho 41. Enkuantu tuir dadus nasionál munisípiu Covalima okupa primeiru lugar ho baze, komunidade ne’ebé simu ona vasina doze dahuluk hamutuk 80.4% no doze daruak 51.8%.(*)
