Tempotimor (Covalima)-Sábadu (16/10) semana ne’e lafaek ida halakon peskadór Marito Magno iha tasi ibun Beko, bainhira matebian ne’e hala’o hela nia servisu hanesan peskadór oha tasi.
Tuir matebian nia kaben, Guelhermina Rani Suriati katak, matebian Marito Magno sai husi uma iha loron Sábadu (16/10) maizmenus tuku 10:30 dader ho objetivu atu ba kail ikan iha tasi Lihu-Ai “Mago Giri”, maibé matebian la fila ba hela fatin tanba hetan tata husi lafaek.
“Nia sai husi uma ne’e atu ba kail ikan, depois nia mesak maka ba kail ikan, ba tiha akontese fali hanesan ne’e, nia sai ne’e iha loron Sábadu iha tuku 10:00 dader to’o Domingu horiseik nia la fila, entaun ha’u ba buka nia mós la hetan, ha’u mai dehan ba nia feton sira haruka ema buka de’it maka horseik hetan,” dehan Guelhermina ba jornalista sira ohin (17/10).
Faluk ne’e mós espresa nia sentimentu triste, tanba lakon ona ema ne’ebé responsabilidade ba familia nia moris.
“Ha’u triste tebes tanba ha’u lakon ona ha’u-nia laen di’ak, durante ne’e ami moris ho peska entaun kuandu nia lakon ona iha ami nia leet, ami atu halo nusa tan,” espresa Guilhermina ho matan-ben.
Iha parte seluk, Cesaltino Assa Soro nu’udar sasin ba matebian nia mate isin ne’e katak, matebian mate iha fatin dook ka kuaze kilomentru tolu, tanba ne’e buka iha loron Sábadu la konsege hetan no halolo tiha ba natureza mak hetan fali iha Domingu maizumenus tuku 10:00 dader.
“Nia Fatin mate ne’e dook, kuaze kilómetru tolu depois amu komunidade iha ne’e sai hotu kedas ba buka matebian, maibé hetan uluk sapeo, entaun ha’u halolo lian, depois lafaek ida mosu mai maibé lakon fali, entaun derpente nia isin rohan ida mosu no ha’u lori ai hodi hasai nia mate isin,” dehan Nia.
Entrerantu Marito Magno mois iha 07 de juñu 1977 ne’ebé kompleta ona tinan 44. Alende matebian husik hela feen kaben, Guilermina Rani Suriati no oan mane ida ne’ebe ho idade 12.(*)
