Tempotimor (Covalima)-Sesta-feira (15/10/2021) semana ne’e, Centru Juventude Covalima (CJC) atribui sertifikadu apresiasaun ba juventude 38 ne’ebé tuir formasaun kona-ba Edukasaun Báziku no Abilidade Moris iha suku Debos postu administrativu Suai munisípiu Covalima.
“Sira tuir formasaun kona-ba Edukasaun Báziku no Abilidade Moris ba juventude durante loron lima, sira iha suku Debos aldeia Lakonak hamutuk 24 no suku suku Ogues 14 entaun sira hamutuk na’in 38 mak ohin simu sertifikadu, ne’ebé ami espera katak sira tuir formasaun durante loron lima nia laran ne’e, fila ba uma no fahe ba sira-nia kolega iha sira-nia bairu, aldeia no suku,” katak reprezentante Koordenadór Ezekutivu CJC, Armando Gomes ba jornalista sira, Ohin (15/10).
Armando mós husu ba juventude sira ne’e labele para iha fatin de’it maibé kontinua aprende iha fatin seluk hodi hetan koñesimentu liután.
“Husu ba alin no kolega sira ne’ebé ohin simu ona sertifikadu labele rai ka hakmatek de’it iha uma, tenke buka aprende iha fatin seluk tan hodi nune’e imi bele iha koñesimentu ne’ebé boot no ami CJC odamatan nakloke ba ita-boot sira atu hakaat ba no aprende,” dehan Nia.
Iha sorin seluk reprezentante juventude aldeia Lakonak suku Debos, Aderito do Carmo kontenti tebes ho formasaun husi CJC durante loron lima, tanba bele aprende saida mak edukasaun bázika.
“Ami kontenti tebes ho formasaun ne’ebé formadór sira husi CJC oferese kuaze semana ida nia laran, tanba aumenta ami-nia koñesimentu kona-ba materiál edukasaun bázika no bele aumenta ami-nia mentalidade, ne’ebé ohin remata ami fila sei implementa no hatutan saida mak ami-nia formadór sira fó ami iha fatin ida ne’e,” katak nia
Entertantu formasaun edukasaun bázika ba juventude foinsa’e sira iha munisípiu Covalima ne’e sei kontinua hikas iha suku beko no suku Matai, postu Muacatar.(*)
