Tempotimor (Covalima)-Polísia Nasionál Timor-Leste (PNTL) liuhusi komandu munisípiu Covalima sei destaka Unidade Espesiál Polísia (UEP) permanente iha área perfurasaun mina matan iha posu Feto Kmaus Suai hodi asegura atividade perfurasaun nomós traballadór sira.
Komandante PNTL Covalima, Superintendente Polísia António Maria De Sá katak, atividade liga ho perfurasaun mina, UEP mak sei halo seguransa másimu durante oras 24.
“Kona-ba seguransa ekipa UEP sira mak halo seguransa 24 horas iha fatin perfurasaun mina nian, nomós seguransa ba traballadór sira,” Hateten Superintendente Polisia António ba jornalista sira sábadu semana ne’e, (23/10).
Dadaun ne’e UEP marka ona prezensa ona iha Covalima, Maibé númeru hira, ne’e segredu seguransa nian, oinsa mak atu asegura perfurasaun mina matan iha posu Feto Kmaus.
Entretantu, tuir informasaun ne’ebé www.tempotimor.com asesu katak, iha loron 27 no 28 semana ne’e governu liuhusi Ministru Petroleum no Minerais (MPM) sei halo lansamentu ne’ebé partisipa direta husi Primeiru Ministru (PM), Taur Matan Ruak.(*)
