Tempotimor (Covalima)-Country Manajer Timor Resources, Filomino Andrade promete, sei emprega Covalimaoan hamutuk 97% iha planu no prosesu explorasaun mina iha rai maran, parte Covalima.
“Iha prosesu ida ne’e ami halo atividade sísmu ne’ebé hala’o iha Covalima, mak Timor Resources sei emprega 97% husi Covalima no iha same sei emprega 98% mesak timoroan,” dehan Filomino Andrade liuhusi konferénsia imprensa ne’ebé hala’o iha Aeroportu internasionál Kayrala Xanana Gusmão Covalima, Horseik (25/10).
“Prosesu rekrutamentu ba timoroan sira ne’e, kompañia sei haree kategória skill, sem-skills, an skill no okazionál ne’ebè sei liu husi teste no tenke haree esperiénsia atividade perfurasaun mina. tanba iha risku no ezijénsia barak katak, tenke hetan rezultadu di’ak, entaun ita tenke buka oinsa iha tékniku ho kapasidade atu hetan rezultadu di’ak,” nia hateten
Prosesu rekrutamentu ba an-skill no okazional, kompaña halo rekrutamentu tuir suku ho totál ema na’in 90, maibé iha Covalima hamutuk suku 30 no aldeia 148, entaun bele mosu problema, maibé tenke haree ba kapasidade no saúde.
“Ita husu ema na’in 5 iha suku ida maibè suku ne’e maka iha aldeia 6 ka 7, ida ne’e ema hotu labele hetan, entaun tenke liu husi teste ita haree ba sira-nia kapasidade atu hala’o servisu maibé importante liu haree ba saúde,” nia subliña
Kompañia Timor Resources labele rezolve kona-ba dezempregu, maibé kompañia fó oportunidade ba ema lokál, sidadaun ne’ebé atu servisu tenke prepara aan la’ós haree ba intelektuál de’it tenke iha saúde di’ak mós. Tanba ne’e aplika politika 75% ba Covalimaoan no 25% ba Manufahioan, maibé kuandu ba halo fali iha Manufahi, 75% ba Manufahioan no 25% ba Covalimaoan. Hanesan ezemplu katak, dadaun ne’e kuziñeiru iha Covalima na’in 12, katak na’in 10 husi Covalima no na’in 2 husi Manufahi.(*)
