Tempotimor (Kovalima)-Violasaun sexuál ne’ebé suspeitu AG halo ba vítima IS ho idade 11 ne’e, Tribunal Distrital Suai (TDS) hasai karta mandadu kapturasaun ba komandu Polísia Nasionál Timor-Leste (PNTL) Munisípiu Kovalima, atu kaptura suspeitu sira ne’ebé involve iha kazu trafiku umanu no halo abuzu sexuál minoridade.
Bazeia ba karta mandadu ne’e PNTL Kovalima kumpri no kaputura ona suspeitu na’in tolu iha domingu (07/11/21) lorokraik, iha ne’ebé suspeitu na’in rua kaptura iha Holbelis Suco Labarai hanesan fen-laen no suspeitu ida seluk kaptura iha Sukaer-laran besik merkadu tuan Suai.
“Iha loron (04/11/2021) lorokraik vítima IS husi nia hela fatin mai merkadu Suai, bainhira vítima to’o iha merkadu Suai konsege hetan suspeitu ho naran inisiál AG ne’ebé rasta ka dada vítima, tamba ho razaun durante ne’e suspeitu AG uza vítima halo relasaun sexuál hanesan nia fen, mezmu ke vítima ne’e ho idade tinan sanulu-resin-ida (11), relasiona suspeitu dada vítima ne’e, vítima mós trauma hodi mai keixa iha PNTL Kovalima hodi deklara katak, durante ne’e suspeitu fó osan ba vítima hodi halo relasaun sexuál, ho ida ne’e PNTL investigasaun halo investiga ba vítima IS kona-ba kronolójia akontesementu ne’e, depois vítima deklara ba PNTL katak suspeita ida ho naran inisiál CS mak transfere ka fa’an fali ba mane seluk hodi hetan osan ho ida ne’e husi Tribunal Distrital Suai ( TDS ) fó sai karta mandadu detensaun ba suspeitu na’in tolu iha loron (25/10/2021), tamba ne’e ohin (08/11/2021), PNTL Kovalima mós halo kapturasaun ba suspeitu hirak ne’e,” dehan Xefe Investigasaun Kriminál PNTL Kovalima, Lorenço do Carmo Gusmão ba jornalista sira, Segunda (08/11).
Nia hatutan, vítima IS hela iha Tafara no suspeitu na’in rua hela iha Holbelis Labarai no suspeitu na’in ida seluk hela iha Sukaer-Laran besik Merkadu.
“Vítima ho naran inisial IS ho idade tinan sanulu resin ida ne’e hela iha Suko Kasabauk, Aldeia Kawa Uman Tafara no suspeitu na’in rua fen ho laen hela iha Holbelis Labarai, laen ho naran inisial TA ho idade 52 no nia fen ho naran inisiál CS ho idade 31 no suspeitu ida seluk hela iha Sukaer laran besik merkadu ho naran inisial AG ho idade 53 ne’ebé halo avuzu sexuál ho vítima naran inisiál IS tinan sanulu resin ida,” Katak Nia.
Entretantu xefe investigasaun kriminál PNTL munisípiu Kovalima, Lourenço do Carmo Gusmão hateten, dadaun ne’e suspeitu na’in tolu detein hela iha Sela PNTL Kovalima hodi hein prosesu primeiru interogatóriu tuir kompeténsia husi Tribunal Distrital Suai nian.(*)
