Tempotimor (Covalima)-Ministériu Edukasaun Juventude no Desportu (MEJD), hamutuk ho Apoiu Lideransa Mentória no Aprendizajen (ALMA) apoiu formasaun jestaun ba lideransa eskola sira hanesan Diretór, Adjuntu Diretór Koordenadór Eskola no Feto Potensial sira oinsa bele jere eskola liu-liu liga ba prosesu ensinu aprendizagem.
“Maske lideransa eskola sira iha ona koñesimentu maibé ita presiza fó formasaun nafatin, tanba matéria balun sira seidauk iha koñesimentu, entaun ho formasaun ne’e sira bele iha koñesimentu hodi bele jere eskola ho di’ak liu no observa professor sira bainhira hanorin estudante iha aula laran,” dehan Vise Prezidente Gabinete Formasaun Professional INFORDEPE, Rui da Costa Belo ba jornalista sira iha resintu Eskola Sekundária Jerál Públika Suai, Sesta (05/11).
Durante ne’e diretór eskola balun la kontrola profesór sira kuandu iha aula laran, entaun liuhusi formasaun ne’e oinsa sira bele halo monitorizasaun bainhira profesór sira hanorin iha sala laran.
Iha sorin seluk ditetór EBC Dato-Tolo, Adão da Cruz dehan, formasaun ba lideransa eskola sira ne’e importante, nune’e lideransa eskola sira iha koñesimentu atu orienta profesór sira hanorin estudante tuir kuríkulu.
“Formasaun ida ne’e importante atu hasa’e ami-nia koñesimentu oinsa atu bele fó orientasaun ba membru sira bele hanorin bazeia ba kuríkulu no métodu hanorin mós bazeia ba padraun husi MEJD,” katak Adão.
Formasaun kona-ba jestaun ne’e realiza ona iha munisípiu Bobonaro, Likisa, Manatutu, Lautem no Covalima, ne’ebé hetan apoiu finanseira husi embaixada Austrália.(*)
