Tempotimor (Kovalima)-Ministériu Ensinu Superiór Siénsia no Kultura (MESSK hamutuk ho Universidade Nasionál Timor Lorosa’e (UNTL)dissemina informasaun ba estudante finalista sira iha Kovalima kona-ba oinsa bele asesu ba UNTL iha tina akadémika 2022.
“Ohin ami halo disemina informasaun ba estudante finalista 2021 nian atu asesu ba UNTL nu’udar diploma ministeriál nú.58/2021 16 de Agostu, kona-ba asesu ensinu superiór públiku liliu ba UNTL no IPB Manufahi,” dehan Xefi Departamentu Kuríkulu Nasional Ensinu Superiór, Ancelo Xavier iha salaun edukasaun Kovalima, Tersa (09/11).
Fontes ne’e komenta, rejime jerál ba kandidatu sira ne’ebé remata ensinu sekundáriu iha tinan akadémiku 2021 no realiza ezame nasionál husi Ministériu Eudukasaun Juventude no Desportu (MEJD). Maibé rejize espesiál ba sira ne’ebé kategóruia espesiál duni.
“Rejime espesiál refere ba kandidatu sira iha kondisaun espesiál hanesan oportunidade, veteranu ka mártires sira nia-oan, kbiit laek nia oan no sira ne’ebé mai husi família ne’ebé ekonomikamente dezfavoresida, kandiatu ho defisiénsia fíziku no sensoriál ne’ebé komprovadu,” dehan Nia.
Nia mós aumenta “prátikante desportivu sira ne’ebé ho rendimentu desportivu aas liu, kandidatu ne’ebé remata ensinu sekundáriu iha eskola internasionál sira iha Timor-Leste, sidadaun timoroan ne’ebé remata eskola sekundáriu iha rai liur, sidadaun estranjéiru sira ne’ebé remata eskola sekundáriu tiha ona, diplomata estranjeiru ne’ebé hala’o misaun iha Timor-Leste ho nia família, kandidatu ne’ebé remata kursu husi ensinu superiór, kandidatu sira ne’ebé ho idade 23 ba leten, maske la remata ensinu sekundáriu tuir númeru 5 husi artigo 18 no lei númeru 14/2008, 29 outubru (lei baze edukasaun, ofisiál husi kuadru permanente husi Polísia Nasionál Timor-Leste no kandidatu sira ne’ebé asesu ba IPB ne’ebé hela iha munisípiu Manufahi,” katak Nia.
Iha fatin hanesan, ditetór servisu edukasaun munisípiu Kovalima, Edmundo Pereira agradese ba ekipa nasionál ne’ebé disemina ona informasaun ba autoridade lokál kona-ba oinsa oan sira atu asesu ba UNTL.
“Ita agradese ekipa MESSK hamutuk ho UNTL mai disemina informasaun kona-ba estudante finalista 2021 nian atu hetan oportunidade ida ne’e, tanba tinan-tinan prosesu atu asesu ba UNTL inan-aman sira seidauk iha koñesimetu, ikus mai hodi ema barak la hola parte iha prosesu selesaun asesu UNTL no IPB,” nia hateten
Maske tinan uluk halo ona diseminasaun informasaun kona-ba atu asesu ba UNTL maibé inan-aman sira kontinua laiha informasaun.
Entertantu prosesu atu asesu ba UNTL fó oportunidade ba veteranu nia oan sira vaga hamutuk 70, maibé na’in 32 ne’ebé rejistu konsege liu hotu, ba família kbiit laek asesu ba UNTL na’in 22, maibé realidade família vulnerável iha Kovalima barak tebes.(*)
