Tempotimor (Covalima)-Diretór Servisu Edukasaun Munisípiu Covalima, Rui Amaral Suri Seran, garantia projetu komunitária ne’ebé la’o hela iha Covalima bele hadi’a ona kualidade edukasaun.
“Tuir ha’u-nia hanoin, ho projetu komunitária iha munisípiu Covalima ne’ebé oras ne’e la’o hela, bele responde ona nesesidade balun husi ita-nia preokupasaun durante ne’e, liliu iha área edukasaun ne’ebé ho projetu 16,” dehan Diretór SEMC, Rui ba jornalista sira iha knaar fatin, Segunda (25/04).
Espera katak, projetu komunitária sei bele la’o hanesan ne’e nafatin ba futuru atu nune’e bele hadi’ak kualidade edukasaun iha nível munisípiu no baze sira.
“Projetu komunitária ne’e di’ak tanba parte ida komuniddae na’in rasik mak servisu, enjiñeiru mós foti husi área ne’ebá rasik, badaen sira mós foti husi ne’ebá, orsamentu sira na’in rasik mak ezekuta, maibé tékniku sira husi edukasaun ba halo kontrolu de’it,” katak Nia.
Diretór ne’e komenta, materiál hotu ne’ebé utiliza ba projetu komunitária ne’e tenke liu husi teste laboratóriu, enkuantu materiál hirak ne’ebé la tama kategória sei labele utiliza iha projeitu refere.
“Projetu ne’e realiza husi programa oitavu governu konstituisionál nian, tanba ne’e sujere ba governu foun ne’ebé mai, se de’it mak kaer ukun tenke implementa nafatin projetu komunitária ne’e, tanba di’ak no bele fó servisu ba komunidade hodi redúz númeru dezempregu iha rai laran liliu iha munisípiu Covalima,” nia tenik.
Entretantu projetu komunitária 16 ne’ebé oras ne’e la’o iha munisípiu Covalima mak hanesan iha Eskola Ensinu Bázika Central (EBC) Postu Zumalai ho montante orsamentu hamutuk $160,283,28, Eskola Bázika Filiál Ucekai ho montante $109,981,83, Eskola Bázika Has Ain ho montante $69,614,12, EBF Soiliga ho montante $101,608,75, EBF Holbolu ho montante $72,561,80, EBF Maukola ho montante $65,448,21, EBF Salasa ho montante $110,004,78, Pre-eskolár Akar Laran ho montante $102,502,01, EBF Laen Tolu ho montante $128,627,66, eskola Sekundária Jerál Públiku Suai ho montante $103,904,22, EBC Traducama $115,378,76, EBF Ai-Toos ho montante $109,418,63, EBF Macocon ho montante $75,543,07, Eskola Sekundária Tékniku Vokasionál Fohorem ho montante $112,263,37, EBC Fatumea ho montante $174,877,75, no Pre-eskolár Buscucun ho montante $112,750,45.(*)
