Tempotimor (Kovalima)-Bazeia ba númeru vasinasaun ne’ebé tuun iha postu administrativu Zumalai, mak Centru Juventude Covalima (CJC) hamutuk ho ekipa profesionál saúde sira iha Kovalima hodi halo kampaña vasinasaun iha aldeia Kulu-oan, suku Tashilin.
Tuir Prezidente Komisaun Organizadora Agustinha Lopes hateten, haree ba loron nasionál juventude ne’ebé besik ona, inklui tema ba tinan 2021 katak, “Juventude sai autór importante ba proteze Timor-Leste husi COVID-19, mak CJC apoiu saúde hodi halo dor-to-dor kona-ba vasina COVID-19.
“Agora ita-nia postu administrativu Zumalai pursentu tuun tebes, ne’ebé la asesu ba vasina, tanba ne’e ohin loron ami mai iha ne’e apoiu ita-nia saúde sira halo kampania vasina no dor-to-dor tama-sai uma no husu inan-aman, juventude sira lalika tauk atu simu vasina no labele fiar informasaun falsu ne’ebe fo sai husi média sosiál sira,” Hatete Prezidente KO Agustinha ba jornalista sira, Ohin (09/11).
Iha sorin seluk Julião Magno husi postu administrativu Zumalai katak, dalan di’ak mak tenke simu vasina, nune’e bele halo movimentu livre no la difikulta ba atividade urjente sira.
“Inan-aman sira, se ita-boot sira tenke vasina nune’e bele halo movimentu livre, hanesan ba Dili no ba merkadu iha Suai, se lae ita-boot sira susar atu asesu ba merkadu no ba ne’ebé de’it, se laiha kartaun kinur ne’e, nomós husu ba inan-aman sira governu la beik atu oho nia povu sira, tanba ne’e husu ita-boot sira labele tauk,” Nia hatete.
Tempu ne’e mós xefe aldeia Kulu-oan, Afonso Sarmento Martins agradese ba pesoál saúde no funsionáriu saúde sira ne’ebé halo dor-to-dor ba programa vasinasaun iha Zumalai.
“Agradese tebes ita-boot sira-nia prezensa ohin loron, se ita-boot sira la mai iha ne’e komunidade sira difisil tebes atu haka’at ba sentru saúde hodi simu vasina, se lae ami avizu no hatete direta mós sira la fiar,” katak Nia.
Entertantu Aldeia Kulu-oan nia populasaun hamutuk 601, husi totál populasaun ne’e komunidade 484 mak hetan ona vasina primeiru no segundu doze, maibé 115 seidauk simu vasina, ohin na’in 50 mak simu tan vasina doze fahuluk.(*)
