Tempotimor (Kovalima)- Prezidente Konsellu Veteranus Munisípiu Kovalima, Alvaro do Nascimento “Sesurai” hakotu ona iis iha Hospital Nasionál Guido Valadares (HNGV) maizoumenus tuku 9:00 oras timor-leste parte dader.
Administrador Munisipiu Kovalima, Francisco de Andrade sente triste, tanba lakon aman veteranus di’ak ida iha Kovalima.
“Ita nia aman “Sesurai” ema ne’ebé mak aman ba Veteranus iha Kovalima, ne’ebé lidera funu iha tempu naruk, tanba ne’e hau hanesan Administrador Munisípiu hamutuk ho povu sira hein nia mate isin lori mai iha Kovalima hodi fo presta homenazem, tanba ne’e agora ami prepara hela” dehan nia iha Edifísiu Administrasaun Munisípiu, tersa (16/11).
Observasaun www.tempotimor.com iha terrenu nota katak, dadaun veteranus barak mak konsentra ona iha Edifísiu Konsellu Veteranus Munisípiu Kovalima no iha matebian nia rezidensia hodi halo preparasaun atu simu saudozu nia mate isin ne’ebé tuir planu sei lori mai iha Munisípiu Kovalima.
Iha fatin seluk, tenta halo intervista ho Sekretáriu Konsellu Veteranus Munisípiu Kovalima, Ozorio Soares “Mau Soko”, maibé nia parte seidauk bele fó informasaun, tanba nia hanoin lakon hafoin rona informasaun veteranus “Sesurai” hakotu iis.
