Deskonfia AMK ‘Hadau’ Komunidade Tashilin no Beco nia Rai

Komunidade suku Tashilin no Beco halo hela protestu hasoru Administrador Kovalima, Francisco de Andrade kona-ba rai Halik. Segunda (15/11). Foto Tempo Timor

Tempotimor (Kovalima)-Relasiona ho disputa rai Halik iha suku Beco, maka komunidade husi suku Tashilin no Beco halo pers konferénsia hasoru Administradór Munisípiu Kovalima, Francisco de Andrade, tanba deskonfia hadau no entrega rai hektares 200-resin  ba kompańia Atauro Expres.

Tuir  Portavoz Bernadino dos Santos liuhusi konferénsia imprensa husu ba kompañia Atauru Expres atu hapara ona atividade iha rai halik, tanba rai halik ne’e pertense ba eransa suku Tashilin no Beco.

Read More

“Ami husi suku Tashilin no suku Beco nain ba rai eransa Halik ne’e husu ba kompañia Atauru Expres atu hapara atividade, tanba rai halik ba ami suku rua  hodi buka moris, ba ami-nia moris no sustenta ami-nia oan lor-loron, maibé kompañia okupa hotu, tanba ne’e ami lakon ami-nia moris fatin, lakon ami-nia fatin ba serimónia kultura nian nomós lakon no buka la hetan restus motais husi ami familia suku rua ne’e uluk mate iha fatin ne’e, hetan bombadeia husi forsa Indonézia, tanba uluk fatin halik ema barak mak subar no mate iha ne’e no tuir fali ami rona katak atu sukat rai eransa kultura Halik hetan ona rekonesimentu husi Avo Nana no Primeiru Ministru Taur Matan Ruak, Prezidente Repúblika Fransisco Guterres ‘Lu Olo” tanente jenrál Lere Anan Timur, ne’e tebes k alae?,” dehan Portavoz Bernardino ba www.tempotimor.com iha Beco, Segunda (15/11).

Portavoz ne’e husu ba liurai iha nasionál no munisípiu atu tulun komunidade sira hodi rezolve problema kona-ba rai Halik ne’e nomós husu ba Konsellu Kombantentes Libertasaun Nasionál (KKLN) atu aselera harii monumentu ba restu mortais ne’ebé ruin sei naklekar hela iha fatin refere.

Reprezentante lia-na’in husi suku Tashilin, Carlos Soares Ferreira imforma rai refere iha evidénsia maka Bee matan no Ai horis balun ne’ebé to’o agora sei eziste.

“Ami iha evidénsia mak hanesan bee matan antigu husi Japaun sira kastigu ami-nia avo no sira halo bee possu agora ne’e fatin sei iha no has sira ne’ebé agora sei iha hela, nuu-hun 100-resin ne’ebé ami kuda, maka kompañia fokit tutuir, iha fulan kotuk liubá nomós antes Japoneza sira tama mai, ami nia Avo sira hela nanis ona, ne’ebé sira atu hadau de’it ne’e ami sei mate mohu,” katak Nia.

“Administradór munisípiu promete ba ami atu tun mai iha fatin ne’e, maibé to’o agora la hetan, maibe kompañia mak kontinua servisu iha fatin ida ne’e, tanba ne’e ami husu ba nai administardór labele bosok ami, tanba ita boot mak ami nia aman ida iha rai Kovalima, se antes ne’e husu komfirma ba ami ko’alia liu husi kultura karik la hanesan ne’e, maibé la komunika, derpente de’it haruka kompañia halo servisu kontinua,” nia esplika.

Hatán ba kestaun ne’e, administradór munisípiu Kovalima, Francisco de Andrade katak, atu desenvolve Kovalima, laiha ema ida maka halo impedementu.

“Rai ne’ebá ne’e rai estadu tanba iha altura ne’ebá investedór sira atu halo investimentu iha ne’ebá, atu hakiak karau, fahi, ikan no boek, eh atu loke mós fábrika, entaun investedór liu husi Terras Propriedades Nasionáal no munisipál mak lori karta ne’e mai iha ne’e, entaun ita fó lisensa no sira investedór ba halo survey fatin ne’ebá, entaun komunidade husi suku rua ne’ebá komesa halo komplain dehan rai ne’e sira nian no ida-idak husi suku rua ne’e komesa ba sukat iha ne’ebá,” Hatete AMC.

Autoriedade Kovalima ne’e afirma, duke Timoroan sai atan ba ema iha ema-nia rai, di’ak liu ita investe iha rai laran.

“Duke ita-nia povu ne’e sai atan ba iha ema-nia rai hanesan Australia, Korea, Inglatera no rai seluk, sira ba iha ne’ebá mós servisu iha ne’ebá hanesan de’it, nusa mak ita Timor bele halo, nune’e bele minimiza joven sira sai ba liur, ne’ebé ba sira ne’ebé komplain ne’e ilegál, tanba la rekoñese husi estadu, tuir há’u-nia aproximasaun rai ne’ebá ne’e rai estadu, ne’ebé laiha ema ida maka atu impede dezenvolvimentu iha rai Kovalima,” Nia hakotu.(*)

Related posts