Tempotimor (Kovalima)-Ministru Asuntu Kombatente Libertasaun Nasionál (MAKLN), Júlio da Costa Sarmento “Meta Mali” husu veteranu sira hamutuk harii unidade atu kontrola oan sira.
“Ha’u konvida veteranu sira hafoin ita ultrapasa situasaun ida ne’ebé difísil durante tinan 24 ita unidade tebes, ita kontrola joven sira ,maibé ohin vetetanu sira la hatene ona kontrola oan,” dehan Meta Mali bainhira partisipa serimónia funerál saudozu SESURAI nian iha aldeia Tabakolot, Suku Debos, Sesta (19/11).
Veteranu sira la kontrola oan sira nasaun komesa atu sai bandidu ona laiha ona ukun, veteranu tenke kontrola oan sira.
“Vetetanu sira tenke hamutuk atu sai forsa no iha unidade ida, tanba unidade maka bele fó solusaun ba buat hotu,” nia dehan.
Governante ne’e mós afirma, saudozu SESURAI nia oan sira estadu sei kontrola, maibé tenke eskola.
“Ha’u atu hatete ba familia saudozu nia oan sei kontrola husi estadu, maibé tenke eskola se la eskola sei iha tan valór ruma ba aban bainrua,” Meta Malik informa
Iha sorin seluk, Xefe Estadu Maiór F-FDTL, Maijór Jenerál, Calisto dos Santos ‘Coliati’, katak atu konstrui rai ida ne’e presija unidade la’ós ho rama ambon.
“Saudozu sira la’ós rai rama ambon ba ita, tuku malu, oho malu, maibé sira rai ba ita atu hadomi malu, ita nia rain kontribui ba paz no estabilidade. ita-nia ukun na’in ho polítiku sira bele hala’o planu atu halo dezenvolvimentu atu fó resposta ita-nia funu. Ita-nia independénsia ne’ebé ita konkista ho ita-nia brani no terus independénsia ida ne’e ita tenke prienxe ho buat ne’ebé pozitivu,” nia hatutan.
Konstrui Timo-Leste la’ós lori rama ambon hodi hafuhu malu no hatudu liman ba malu, bainhira uza ida ne’e mak sei la konstroi rai ida ne’e.
“Atu konstoi rai ida ne’e, presija ita hotu nia unidade hodi fó liman ba malu labele hatudu liman ba malu bebeik ita nia saudozu fó sira-nia vida la haree ba kor. Tanba domin ba povu no ba rai ida ne’e, ita ne’ebé moris atu hatutan sira-nia misaun hein entrega ita-nia an ba ita-nia rai ida ne’e. nune’e ita bele halo kontribui ba paz no estabilidade,” Nia tenik.(*)
