Tempotimor (Kovalima)-Vendedór merkadu Suai triste ho kondisaun merkadu kamnasa tanba tempu udan nakonu ho tahu no defisíl atu rai sasan.
Vendedór Martina do Ceu sente triste ho kondisaun merkadu suai Kamnasa tanba nakonu ho tahu.
“Ami husu ba nai ulun sira iha munisípiu Kovalima, atu haree mós kondisaun merkasdu Suai ne’e, tanba tempu udan ne’e ami fa’an iha tahu leten, ne’ebé nudar makfa’an iha ne’e triste tebes, tanba buat ki’ik sira hanesan ne’e mós sira lakohi reslzolve ba ami,” dehan Martina do Ceu iha merkadu Kamnasa, Sábadu (20/11).
Alende ne’e vendedór Sipriano da Cruz mós husu ba parte relevante atu ateru rai henek ba fatin ne’ebé nakonu ho tahu, nune’e vendedór sira bele fa’an ho seguru.
“Ami la husu ba buat seluk ami husu de’it ita-nia nai administradór sira no kompañia sira iha Kovalima sira ne’e ateru netik rai henek ruma iha merkadu ne’e, tanba tempu udan hanesan ne’e difísil atu halo movimentu iha área merkadu laran no ema sosa mós la iha tanba nakonu ho tahu,depois tahu is halo ema la besik ami-nia sasan,” hateten Cipriano.
Relasiona ho preokupasaun ne’e xefe merkadu Suai, Mafalda Cardoso da Costa sei husu ajuda ba autoridade lokól no kompañia sira hodi ateru merkadu Suai.
“Sim, ita-nia merkadu Suai ne’e nakonu ho tahu bainhira tempu udan hanesan ne’e, ne’ebé segunda oin ha’u sei ko’alia ho ita-nia nai ulun sira iha Suai no husu ajuda ba kompañia sira ne’ebé iha Suai nune’e bele ateru netik rai henek iha fatin ne’e, ne’ebé ida ne’e mak husi ha’u atu rezolve situasaun ho solusaun badak,” hakotu nia.(*)
