Tempotimor (Kovalima)-Tuir xefe seksaun setor primaria, Autoridade Inspesaun Fiskalizasaun Atividade Ekonómia Sanitária no Alimentar (AIFAESA), Armindo Gonçalves katak, tinan tomak la hala’o inspesaun ba loja no kios sira iha Kovalima, tanba impaktu hosi pandemia COVID-19 ne’ebé afeta mundu inklui Timor-Leste.
“Planu ne’ebé estabelese ona ekipa AIFAESA iha semana ida ne’e mai halo inspesaun iha munisípiu Kovalima ne’ebé kobre ba postu administrativu Zumalai, Tilomar no Suai tanba tinan 2020 la halo inspesaun tanba impaktu hosi COVID-19,” katak xefe seksaun AIFAESA, Armindo ba jornalista sira hafoin halo inspesaun ba loja no kios sira iha merkadu Suai, Sábadu (20/11).
Inspesaun ida ne’e atu halo kontrolu atividade ekonomi ne’ebé realiza iha teritóriu liu-liu iha munisípiu Kovalima tanba kuaze tinan ida resin AIFAESA seidauk halo inspesaun iha munisipiu Kovalima.
Atividade inspesaun iha Kovalima la hala’o tanba estadu Timor-Leste infrenta situasaun pandemia COVID-19 hodi impede atividade inspesaun iha munisípiu refere.
“Loloos ne’e inspesaun hala’o iha tinan anteriór maibé tanba COVID-19, entaun semana ida ne’e ekipa AIFAESA foin hala’o atividade kobre atividade komersiál sira ne’ebé hala’o iha munisípiu ida ne’e hodi haree produtu sira ho nia kondisaun liu prazu ne’ebé kintinua fa’an inklui sasan balun ne’ebé haree ba nia legalidade husi atividade ekonómia sira, haree lisensa komersiál inklui haree moós ba fatin estabelesementu industriál sira no kondisaun ijene,” Nia hakotu.(*)
