Tempotimor (Kovalima)-Komemorasaun 28 novembru ba dala-46 iha Timor-Leste, maka komunidade iha postu administrativu Fohorem realiza atividade desportu hodi anima komunidade no juventude sira iha postu Fohorem.
Tuir Administardór Postu Administrativu Fohorem (APAF), Carlos Carvalho de Araújo katak, realiza atividade desportu atu kria amizade, la’ós kona-ba manan ka lakon.
“Iha aktividade ne’e ita hakarak unidade, la’ós premiu mak ita hakarak hetan, ha’u hakarak manan karik imi manan hotu, lakon mós ita lakon hotu, tanba ita ne’e mesak Fohorem oan,” dehan APAF bainhira halo intervensaun iha serimonia aberura atividade desportu iha EBC Fohorem, Ohin (21/11).
Atividade desportu ne’e sei iha kompetisaun ba modalidade haat ne’ebé sura mós ho jogu komunitáriu ne’ebe Bei-ala sira rai hela ona mak kompetisaun Hana Kaleik.
“Modalidade 4 mak iha Kompetisaun ne’e mak hanesan Vollibol feto no mane, futebol, marantona ba feto no mane inklui jogu tradisionál hana Kaleik,” Tenik Nia.
Enkuantu Komandante Inspetór Polísia Eskuadra Postu Fohorem, Raimundo de Araújo husu ba jogadór sira atu mantein estabilidade tanba segaransa iha mós juventude hotu nia resposabilidade.
“Husu ba imi atu mantein seguransa durante joga ne’e hala’o, tanba seguransa ne’e la’ós de’it iha ami maibé iha imi-nia liman moós,” nia dehan.
Kompetisaun jogu amizade ne’e sei partisipa husi juventude sira iha suku haat ne’ebé lokaliza iha Postu Fohorem. No jogu ne’e rasik hahú husi loron 20 no remata iha 28 novembru 2021,” katak Nia.(*)
