Tempotimor (Kovalima)-Polísia Servisu Investigasaun Krminál (PSIK) Kovalima ezekuta mandadu kapturasaun husi Tribunal Distritál Suai (TDS) hodi kaptura arguidu ho naran inisiál BP (68) iha aldeia Bebora, suku Raimea postu administrativu Zumalai tanba komete Krime Ofensas Integridade Fízika Grave.
Iha prosesu kapturasaun ne’e, Komandante PNTL Servisu Investigasaun Kriminál Sarjentu xefe Lourenço Gusmão katak, PNTL halo kapturasaun tanba arguidu involve aktu krimi ne’ebé previstu iha kódigu penál artigu 146.
“Mandadu ne’e mai husi tribunal, durante ita-nia prosesu ne’e la’o dalaruma sala fallansu ita la atende, ne’ebé ikus mai tribunal hasai desizaun tama prisaun durante tinan 4,” hateten Sargentu xefe Lorenço ba www.tempotimor.com, Ohin (21/11).
Tuir mandadu tribunál nian arguidu BP sei detein iha prizaun Suai durante tinan haat hodi kumpri aktu krimi ne’ebé arguidu komete.
“Ohin kedas ami lori ita ba komandu depois kontinua ba prizaun Suai hodi detein tinan haat iha ne’ebá,” nia tenik.
Tuir kronolójia arguidu BP iha tinan 2015 involve iha aktu krimi integridade fisika grave tanba ta’a nia feen-kaben nia liman rua hafoin kaer toman ho mane seluk iha sira nia rezidénsia no hafoin akontesimentu ne’e arguidu aprezenta aan ba PNTL hodi submete ba prosesu judisiáriu no to’o domingu ne’e PNTL liuhusi SIK kaptura arguidu iha nia residénsia no lori kedan arguidu ba prisaun Suai hodi kumpri pena prisaun tinan haat ne’ebe tribunál aplika arguidu.(*)
