Tempotimor (Kovalima)-Komisaun Nasionál Eleisoens (CNE-Sigla Portugés), Kovalima hahú fó edukasaun sívika ba prizoneiru sira iha prizaun Covalima liga ho eleisaun prezidensiál ne’ebé sei realiza iha tinan oin.
Programa edukasaun sívika ne’ebé abertura hosi administradór postu administrativu Suai Vila, Luzinho do Gego ne’e dehan, programa eduksaun sívika importante ba sidadaun sira hotu iha teritóriu Timor laran tomak.
“Ha’u hanoin CNE nia programa ne’e governu konsidera ema hotu iha direitu hanesan atu asesu ba kualker informasaun kona-ba polítiku no seluk tan,” dehan Luzinho liuhusi diskursu prizaun Suai, Tersa (23/11).
Programa eduksaun sívika ne’e CNE hakarak garante ba sidadaun iha prizaun nomós iha direitu hanesan ho sidadaun sira seluk no promove prosesu eleitorál ida integridade no imparsialidade ho situasaun COVID-19.
“Ita hotu tenke tau atensaun máximu informasaun hirak ne’ebé sei hato’o husi diretór CNE Covalima ho nia ekipa, ita hotu ezerse ita-nia direitu hanesan sidadaun atu deside ita-nia votu ba prezidente no partidu polítiku ida atu lidera durante tinan lima tenke hatene sira-nia programa no polítika,” nia hatutan.
Iha sorin seluk, diretór CNE Munisípiu Covalima, Hermenegildo de Sena esplika, CNE realiza eduksaun sívika ne’e atu prepara hodi hasoru eleisaun prezidensial ne’ebé sei realiza iha tinan oi.
“Ami realiza eduksaun sívika relasiona prepara hodi hasoru eleisaun prezidensial katak, CNE laiha diskrimina ba sidadaun sira,” nia hateten
Alende ne’e segundu komandante eskuadra Suai, Primeriu Sarjentu, João Alves katak, parte seguransa prontu atu fó seguransa ba atividade hosi CNE ne’ebé realiza edukasaun sívika ba sidadaun sira.
“Iha oportunidade ne’e apresira tebes insiativa husi CNE hodi informasaun ba ita-nia tiu, maun-alin sira iha prizaun Covalima, tanba bainhira realiza eleisaun seguransa sempre fó asistensia seguransa máximu ba kualker atividade ne’ebé mósu iha territóriu nasionàl,” katak Nia.
Diretór estabelesimentu prijonál Suai, Júlio Dias Ximenes afirma, edukasaun sívika importante ba sidadaun hotu.
“Edukasaun sívika ne’e loos duni importante ba ita hotu. tanba nu’udar sidadaun iha direitu atu hili, tanba ne’e edukasaun sívika hanesan preparasaun ba eleisaun 2022 mai,” nia tenik.
Entretanto prizoneiru sira iha prizaun Suai hamutuk na’in 110 ne’ebé na’in 71 mak kondenauu no na’in 39 mak prizaun preventiva.(*)
