Tempotimor (Kovalima)-Ekipa Programa Dezenvovimentu Feto Rurál (PDFR) husi Sentru Komunidade Kovalima (CCC-Sigla Portugés) fasilita treinamentu kona-ba igualidade jéneru ba membru konsellu suku no joven husi suku haat iha postu Suai munisípiu Kovalima.
Tuir fasilitadór programa igualidade jéneru SKK, Teresa Maria Moniz katak, objetivu treinamentu ne’e atu fahe knaar feto no mane kona-ba igualidade jéneru, oinsa atu fahe responsabilidade iha uma laran.
“Treinamentu durante loron tolu nia laran atu hasa’e delegada nomós ba feen-laen sira-nia koñesimentu ba igualidade jéneru liu-liu knaar no respnsabilidade iha uma laran hodi hamenus konflitu, tanba durante ne’e isu ne’ebé ita rona, sira ladun komprende familia uma laran, ne’ebé liuhusi issu ne’e mak ita fasilita sira kona-ba igualidade jéneru,bnune’e iha familia laran hanesan feen-laen sira fahe kna’ar ba malu no komprende malu kona-ba servisu uma laran nian,” dehan Teresa ba jornalista sira iha salaun SKK, Tersa (23/11).
Nia afirma, “treinamentu ne’e foka liu ba feen-laen hotu, se formasaun ba sira nia feen de’it ne’e mane nafatin ko’alia, mais ne’e ba mós laen, nune’e bele hala’o no fahe knaar iha uma laran hanesan, tanba tuir kultura mane mak iha papél liu, tanba ne’e ami fó treinamentu ba feen-laen nune’e bele kompriende servisu uma laran,” tenik nia
Entretantu Cariana Elsa Barreto Amaral husi Suku Matai ne’ebé partisipa iha treinamentu ne’e orgullu tebes tanba bele hetan matéria kona-ba harmonizasaun familia uma laran.
“Kontenti tebes tuir formasaun durante loron tolu iha ne’e, tanba liuhusi treinamentu hanesan ne’e ami familia uma laran bele fahe serbisu no fó tempu ba malu, tanba nune’e ami bele harmoniza liután familia uma laran nian hodi nune’e labele akontese violénsia doméstika,” katak Nia.
Entretantu komunidade sira ne’ebé partisipa iha treinamentu ne’e mai husi suku Matai, Ogues Kamnasa no Sualioro durante loron tolu.(*)
