Tempotimor (Kovalima)-Sentru Esperansa ba Feto (SEF) hamutuk ho Rede Referal reintegra ona vítima JMS ba familia iha Maudemo, postu Tilomar hafoin hetan abuzu sexuál husi ema iresponsabilidade iha tinan ida rua liubá.
Iha momentu reintegrasaun vítima ba familia, ho haksolok familia simu JMS ho matawen no hodi kultura hisik ba vítima JMS ho nia oan ne’ebe durante ne’e iha Sentru Esperansa ba Feto hamutuk ho madre sira tinan ida resin, tanba problema ne’ebé akontese ba nia iha tinan kotuk liubá.
Reprezentante familia vítima, Isac da Silva agradese ba SEF no Rede Referal Kovalima, tanba durante ne’e hamaluk ona vítima ho nia oan durante situasaun presaun.
“Agradese tebes ba ita-boot sira, tanba durante tinan ida resin iha fatin ne’ebá fila mai ha’u-nia subriña no oan kondisaun normal, ne’ebé ida ne’e ami selu labele só Maromak bele haree no selu buat ne’ebé imi halo ba sira na’in rua, ne’ebè ami reprezenta familia husu de’it se bele apoiu mós parte edukasaun, para nia bele kontinua nia eskola ka lae. tanba dalaruma ami mak lori ba atu eskola parte husi eskola ka ema ruma husu ami tun-sa’e. Maibé husi sentru esperansa ba feto hamutuk ho Rede referral liuhusi karta ruma bele atende ho lalais,” dehan Isac hafoin simu vítima iha Suku Maudemo. Kuarta (01/12).
Kestaun ne’e Madre Santina de Oliveira mós agradese ba JMS nia familia, tanba simu ho di’ak no promote sei ajuda vítima ne’e hodi bele kontinua nia eskola.
“Ami mós agradese tebes aman Maromak tanba liuhusi Maromak nia forsa familia hotu ne’ebé iha ne’e, simu ami ho di’ak no liliu simu imi-nia oan ne’ebé hetan problema iha tinan kotuk liubá, maibé ohin simu malu di’ak tebes, tanba ne’e ami agradese tebes ba ita nia kooperasaun ne’ebé di’ak, ne’ebé ami sei la husik JMS ho nia oan ne’e. Ami kada fulan mai haree bebeik nia ho nia oan nomós ami prontu apoiu nia ka ajuda nia buka dalan ba nia atu nia bele kontinua nia eskola,” hateten nia.
Madre ne’e mós husu ba familia vítima atu labele fó presaun no haree sira na’in rua hanesan problema laiha ba sira na’in rua.(*)
