António Husu Komunidade Keixa Membru PNTL Kasa Animal Fuik

Komandante PNTL Munispiu Covalima, Superintendente Polisia Antonio Maria de Sa ko'alia hela ho jornalista sira iha temp[u balun liuba. Foto Tempo Timor

Tempotimor (Kovalima)-Relasiona ho informasaun ne’ebé espalla iha públiku inklui média nasionál balun públika ona katak membru Polísia Nasionál Timor-Leste (PNTL) iha munisípiu Kovalima balun uza kilat manu hodi kasa animal fuik, maka Komandante PNTL munisípiu Kovalima, Superintendente Polísia António Maria de Sá husu komunidade atu aprezenta keixa hasoru membru PNTL sira.

Ba jornalista sira Komandante PNTL munisípiu Kovalima, Superintendente Polísia, António Maria de Sá katak, odamatan Komandu PNTL Kovalima nakloke ba sidadaun hotu atu hato’o keixa bainhira hetan membru PNTL uza kilat manu lori kasa animal fuik sira.

Read More

“Komandu seidauk simu keixa kona-ba tipu kilat saida, membru ne’e se maka lori, membru PNTL ne’e husi ne’ebe? maibé informasaun espalla ona iha mídia, maibé tuir lei ne’e se maka haree tenke mai keixa, ne’e para bele hatene tuir, ne’ebé odomatan komandu PNTL Kovalima, nakloke ba sidadaun sira hotu atu hato’o keixa bainhira hetan membru sira uza kilat manu kasa animal fuik,” dehan komandante Antonio iha monumentu masakre Setembru Negro Suai, Ohin (07/12).

Bainhira komandu identifika katak membru PNTL balun mak uza kilat manu hodi kasa animal fuik sira, maka komandu sei prosesu, maibé tenke hatudu evidénsia.

“Bainhira ita simu keixa, Komandu sei halo prosessu investigasaun tanba iha regulamentu disiplinar ne’e define klaru, maibé tenke iha keixa ruma labele ko’alia de’it dehan membru PNTL uza kilat manu kasa animal fuik mas laiha evidénsia, entaun ne’e hanesan de’it,” nia dehan.

Entretantu Komandante PNTL munisípiu Kovalima, Superintendente António Maria de Sa, fó ona orientasaun ba komandante eskuadra sira iha postu atu buka tuir informasaun relasiona ho publikasaun iha mídia kona-ba membru PNTL balun uza kilat hodi manu kasa animal fuik sira.(*)

Related posts