Tempotimor (Covalima)-Sekretáriu Estadu Juventude no Desportu (SEJD) hamutuk ho Centru Juventude Covalima (CJC) fó formasaun ba juventude sira husi suku 30 iha Covalima kona-ba planeamentu proposta monitorizasaun ba relatoriu liga ho programa estimulu empreendedorizmu iha suku.
Tuir Diretór Ezekutivu CJC, Calistro Leite Gusmão katak, joven eleitu husi suku 30 ne’ebé partisipa iha formasaun ne’e atu aproveita durante loron lima iha área empreenderizmu nian.
“SEJD liuhusi CJC fasilita kolega joven sira husi suku 30, tanba iha atividade barak iha suku sira, hanesan foin dadauk liuba kona programa estimulu empreendedorizmu suku, maibe difikuldade barak ne’ebé ami infrenta mak maioria joven laiha konesimentu kona hakerek proposta, tanba ne’e ami servisu hamutuk hodi fó formasaun uluk ba ita-boot sira ne’ebé eleitu husi suku sira, nune’e ba oin bele joven eleitu suku sira mak hanorin joven sira seluk iha suku,” dehan Diretór Ezekutivu CJC, Calistro liuhusi diskursu, Segunda (13/12).
Iha sorin seluk reprezentante SEJD, Moniz Gonçalves husu ba joven eleitu suku sira atu aprende hamutuk husi fasilitadór ne’ebé fó formasaun durante loron lima nia laran.
“Formasaun ne’e durante loron lima, ne’ebé husu ba kolega joven eleitu iha Covalima atu aprende hamutuk husi fasilitadór sira husi SEJD kona-ba oinsa halo analiza no identifika problema hirak ne’ebé joven sira hasoru, oinsa halo planu preprasaun orsamentu oinsa halo monitorizasaun, avalisaun no oinsa atu hakerek relatóriu,” Informa nia
Administradór Fransisco husu ba juventude nian atu aprende ho id’ak, nune’e bele implementa iha ida-idak nia suku.
“Liuhusi formasaun ida ne’e atu koloka imi-nia an ba imi-nia atividade sira iha suku, bele forma grupu no halo proposta, entaun aproveita formasaun ida ne’e ho seriedade ho kontinua aprende buat ruma, fila hodi implementa iha suku. Iha tempu ukun-an joven labele hatoman an sai tabele no maupagadór maibé sai transformadór iha suku laran,” Hateten Administradór ne’e.(*)
