Tempotimor (Covalima)-Segunda-feira (13/12/2021) ne’e, Servisu Munisipal Agrikultór hala’o lansamentu ba kuda batar Sele hekatres lima iha to’os sukabi-mesak suku Suailoro, postu administrativu Suai tuir sistema Praktika Agrikultór Di’ak (PAD) ba époka primeiru iha tinan 2021.
Iha lansamentu ne’e, Administradór Munisípiu Covalima (AMC), Francisco de Andrade katak, grupu agrikultór ne’e inisitiva husi komunidade rasik, tanba ne’e apresia ba grupu refere no kontinua to’o koleita batar ne’e.
” Ha’u fiar katak grupu ne’ebé mak ita-boot sira forma ona ne’e atu sai hanesan grupu agrikultór ninian hodi sustenta ita-boot sira-nia moris no ha’u fiar katak, inisiativa ida ne’e mai husi ita-boot sira rasik, ne’ebé ami mós hakarak haree ohin lansamentu ba oin ninia finalidade tenki to’o kolleta no tempu kolleta ami mós sei prezente atu nune’e ami bele haree ho matan los duni ka lae? inisiativa ida ne’e iha benefísiu to’o kolleta, tanba iha fatin balun akontese bebeik bainhira kuda hotu to’o atu ba kolleta batar laiha,” dehan administradór Fransisco ba jornalista sira Ohin, (13/12).
Nia hatutan, dadaun ne’e governu ajuda mina ho fini gratuita ba agrikultór sira atu hodi hala’o sira-nia servisu hanesan agrikultór tenke hatudu rezultadu di’ak, tanba rai Suai potensiál ba aihan lokál.
“Dadaun guvernu ajuda mina ba traktor ho fini gratuita, tanba sa mak ita lakoi halo di’ak liután?, liuhusi ajuda sira ne’e ohin ita halo lansamentu ba segundu ves no tenki iha nia rezultadu ida ne’ebé di’ak liután kompara ho permeira tanba ne’e husu nafatin ba ita hotu nia kolaborasaun atu nune’e bele hetan rezultadu ne’ebé di’ak, tanba ita hotu hatene katak ita-nia rai Suai ne’e rai bokur, ne’ebe husu ba xefe suku sira atu buka tan grupu balun atu apoiu tan grupu ida ne’e, nune’e labele hakilar bebeik ba hamlaha,” Tenik AMC Fransisco
Iha fatin hanesan xefe Grupu Susar Hadomi (GSH), Manuel dos Santos promote sei hatudu rezultadu di’ak ba nai ulun sira, maibé nia husu mós ba Autoridade sira atu apoiu ekxa ida hodi ke’e bee fatin, nune’e labele estragus grupu sira-nia to’os.
“Difikuldade ne’ebé ami hasoru mak fila rai no fini, maibe husi Ministériu Agrikultura no Peskas (MAP) apoiu ona ami tratór no apoiu ona fini ba ami, ne’ebe ohin mai halo lansamentu kuda batar iha to’os hektares lima ne’e, ne’ebe ami halo lutu metin nune’e karau sira labele estraga ami-nia aihan sira ne’ebe ami kuda ona, nune’e bele hatudu rezultadu to’o koleita, nomós ami husu se bele apoiu ekxa nune’e bele suru rai henek hodi salva ami-nia to’os se lae bee ne’e sa’e estraga hotu ami-nia to’os,” xefe grupu ne’e dehan.(*)
