2021, Inan-Aman Husi Estudante Kontribui $57.807 ba ESJP

Diretór ESJP Suai, Francelino Freitas Carvalho ko'alia hela ho jornalista sira kona-ba velor estudante sira nian, iha nia knaar fatin ESJP Suai, Segunda (20/12). Foto Tempo Timor

Tempotimor (Covalima)-Tuir diretór Eskola Sekundária Jerál Públika (ESJP) Suai, Francelino Freitas Carvalho katak, iha tinan ne’e, inan-aman husi estudante sira iha ESJP Suai kontribui osan ba dezenvolvimentu iha eskola ne’e hamutuk dolar amerikanu $57.807,00.

“Progressu dezenvolvimentu lubuk ida maka ami atinji, utiliza kontribuisaun fundus ne’ebé inan-aman kontribui, hahú ha’u-nia mandatu reabilita edifísiu eskola nian, konstroi rede haleu eskola, halo armáriu, meza no kadeira iha kada turma, depois pinta sala-de-aula, halo manutensaun ba mákina mota bomba tanba ami kanaliza bee ba kada turma, sosa komputadór 30, ekipamentus banda múzika nian, sosa dram beand, hadi’a jardim eskola hodi halo estatua, inklui reabilita kampu busketbal, instala rede internet hodi kria website eskola nian, selu profesór parsiais sira no seluk tan,” dehan Francelino ba jornalista sira iha nia knaar fatin, Segunda (20/12).

Read More

Iha fatin hanesan gabinete diretiva ESJP Suai, Calistro Leite Gusmão afirma, estudante iha ESJP Suai hamutuk rihun 2.141 ne’ebé kompostu husi klase désimu anu hamutuk 829, désimu primeiru anu na’in 632 no désimu segundu anu na’in 680. Nune’e husi estudante hirak ne’e kada fulan kontribui $2.25 sentavus.

“Osan propinas kontribuisaun husi inan-aman iha tinan ne’e hamutuk rihun $57.807,00 tanba kada fulan estudante ida hatama dolar rua sentavus limanulu, entaun tinan ida kada estudante kontribui dolar $27.00,” katak Nia.

Entretantu kona-ba propinas sei iha fundus restu ho montante rihun $8.000-resin, tanba ne’e eskola sekundária jerál públika Suai planeia sei prevé tan ba kondisaun eskola nian balun.(*)

Related posts