Tempotimor (Covalima)-Relasiona ho ezame pasajem klase ne’ebé Ministériu Edukasaun Juventude no Desportu (MEJD) realiza iha fulan novembru 2021 ne’e, lori vitória ba estudante hamutuk rihun 1.461 iha Eskola Sekundária Jerál Públika (ESJP) Suai, tanba hetan rezultadu pozitivu ka pasa hotu.
Ba jornalista sira diretór ESJP Suai, Francelino Freitas Carvalho haktuir, maske ho situasaun pandémia COVID-19, maibe eskola nafatin esforsu no ikus mai estudante sira hetan rezultadu pozitivu iha ezame pasazem klase iha terseiru periodu.
“Ohin Estudante simu ona kaderneta, totál estudante désimu anu hamutuk 829, désimu primeiru anu hamutuk 632, ne’ebé maske ho situasaun pandemia, maibé há’u bele dehan estudante sira ne’e hetan rezultadu pozitivu,” dehan Francelino iha nia knaar fatin ESJP Suai, Segunda (20/12).
Diretór ne’e informa, estudante ne’ebé la partisipa iha ezame no sai eskola laiha informasaun ruma, estudante hirak ne’e maka la pasa iha ezame pasazem klase.
“Estudante ne’ebé la passa iha ezame ne’e tanba dalaruma sira la tuir ezame no balun sai eskola sein informasaun, sira ne’e maka la pasa, maibé ida ne’ebé partisipa iha ezame sira simu rezultadu pozitivu,” diretór klarifika.(*)
