Tempotimor (Covalima)- Tempu udan komunidade husi Aldeia Aidantuik, Suku Beco, Postu Administrativu Suai, Munisípiu Covalima susar atu asesu ba merkadu, tanba kondisaun estarada la diak.
“Ami iha ne’e, tempu udan defisil tebes atu asesu ba merkadu, tanba kondisaun estrada halo kareta ho motor tama iha ami nia bairro ka aldeia ne’e ladiak, tanba kondisaun tahu naruk, ne’ebe ami husu se bele ateru de’it rai henek ruma, nune’e ami bele asesu estrda ho diak, ami bele fa’an ami nia produtu iha merkadu,” dehan Delegadu Aldeia Aidantuik, João Bosco, segunda (10/01).
Tanba ne’e, hamutuk ho komunidade hodi hato’o ba Sefe Suku Beco atu bele aprezenta preokupasaun iha Munisípiu.
“Ami ho komunidade hamutuk sei halo planu ida, nune’e hato’o ba sefe suku bele buka dalan oinsa ho kompañia sira ne’ebe iha ne’e no mós hato’o iha Munisípiu, nune’e bele haree difikuldade hirak ne’e, tanba kada tinan tempu udan tahu halo ami sai ba mai mós ladiak,” nia haktuir
Iha sorin seluk komunidade, Mariana Bui sente triste ho kondisaun estrada iha Aldeia liga ba Merkadu, tanba tahu ne’ebé nakonu difikulta movimentasaun.
“Ami triste tebes, tanba tempu udan ami iha ne’e difisil tebes lori transporte hanesan kareta ho motor, tanba ho kondisaun tahu ne’ebé naruk halo ami ba mai ladiak, ami husu se bele tau rai henek ruma, nune’e ami bele ba mai diak,” nia dehan
Aldeia Aidan tuik, Suku Beco iha sefe família hamutuk 153, populasaun 649 ne’ebé kompostu husi mane 381 no feto 268. (*)