Senti Triste ho Nakukun, Aldeia-2 Iha Suai Instala Rasik Liña Eletrisidade

Komunidade husi aldeia rua iha Munisipiu Covalima, dada hela lina Eletrisidade, Sabadu (08/05). Foto Tempo Timor

Tempotimor (Covalima)- Timor-Leste ukun an besik tina 19 ona, maibe komunidade aldeia Uluk lolo ho Laegatal husi Suku Lour, Postu administrativu Zumalai Munisípiu Covalima sidauk asesu ba eletrisidade, tanba ne’e sira desidi hodi instala rasik liña eletrisidade.

Tuir xefe juventude aldeia Uluk lolo, Xisto Perreira katak, komunidade rasik halo kontribuisaun, nune’e hodi hola fiu no instala rasik liña eletrisidade ba aldeia rua ne’e, tanba Timor-Leste hetan indenpendénsia tinan 19 ona, maibé aldeia rua ne’e seidauk asesu eletrisidade.

Read More

“Ami sente triste tebes, tanba husi tempu okupasaun Indonézia ate agora ami aldeia rua ne’e seidauk asesu eletrisidade, ne’ebé ami husu governu relevante, liliu parte EDTL munisípiu no nasionál atu rezolve problema refere, maibé tanba laiha resposta to’o agora, mak ami komunidade aldeia rua iha inisiativa rasik hodi sosa fiu eletrisidade hodi dada ahi mai ami-nia aldeia,” dehan Xisto ba www.tempotimor.com liuhusi via telefone, Sábadu (8/5).

Iha parte seluk xefe suku Lour Martino Juli Barreto Alves afirma, kada uma-ka’in kontribui dollar Amerikanu sanulu no balu liu, ne’ebé totál orsamentu liu rihun hodi sosa fiu no selu téknikusira ne’ebé instala eletrisidade.

“Totál populasaun iha suku Lour hamutuk rihun ida resin, maibé iha aldeia rua Uluk lolo no Laegatal hamutuk uma-ka’in atus rua resin, ne’ebe dadaun ne’e instala hela eletrisidade. Maibé iha suku Lour ne’e aldeia lima mak seidauk asesu eletrisidade, maibé tuir planu ha’u sei tur hamutuk ho komunidade aldeia husi aldeia Pelet no Salasa no aldeia seluk tan,” dehan nia.

Xefe suku ne’e komenta, preokupasaun kona-ba liña eletrisidade hato’o bei-beik ona ba parte munisípiu no nasionál, maibe to’o agora seidauk responde, tanba ne’e komunidade aldeia rua ne’e kontribui rasik osan hodi hola fiu.

Orsamentu ne’ebé komunidade sira kontribui ne’e la hetan tan apoiu husi governu ka organizasaun ruma maibé kontribuisaun ne’ebé komunidade rasik halo no kada uma-ka’in kontribui $10. Entretantu, distánsia husi bairru Geren las ba aldeia Laegatal no Uluk Lolo iha kilómetru rua.

Alende ne’e, to’o notísia públika, www.tempotimor.com seidauk komfirma ho EDTL munisípiu Covalima, tanba ekipa EDTL la halo servisu iha loron sábadu.(*)

Related posts