Tempotimor (Covalima)-Liga ba mudansa lideransa iha komandu munisípiu nian, mak Superintendente Polísia Basílio de Jesus subtitui no lidera ona Polísia Nasionál Timor-Leste (PNTL) Munisípiu Covalima hafoin komandante PNTL Superintendente Polísia António Maria de Sá koloka no lidera fali komandu PNTL Munisípiu Baucau.
Hafoin Super-Intendente Polísia Basílio de Jesus hala’o kna’ar loron dahuluk iha komandu PNTL Covalima hateten, prezensa iha Covalima atu servi no salvaguarda povu nia vida, tanba ne’e husu ba membru sira atu labele haree povu hanesan inimigu ida.
“Ho ha’u-nia prezensa ita hamutuk atu fo seguransa di’ak ba ita-nia povu, atu nune’e sira bele moris iha situasaun hakmatek, oinsa ita bele servi povu ho dignu, ida ne’e maka misaun forsa ka militar nian, tanba ne’ ha’u dehan, sai militar hanesan liman kroat povu nian labele haree povu hanesan ita-nia inimigu,” katak Basílio liuhusi diskursu bainhira realiza formatura iha Komandu PNTL Covalima. Kinta (13/01).
Nia akresenta, Polísia la’ós atu sai inimigu ho nia povu, maibé atu fo seguransa ba nia povu ho dignu iha rai ne’e.
“Sai forsa atu defeza, sai forsa atu povu hakmatek la’ós atu sai inimigu ho povu, bainhira komunidade problema ruma polísia to’o fatin baku arbiru komunidade sira, halo komunidade sai triste, entaun komunidade konfuzaun, polísia atu salva ka mai atu baku, komunidade haree ita halai arbiru de’it, ne’ebé ho ha’u-nia prezensa evita buat sira ne’e,” Nia enkoraja membru sira.
Komandante foun iha komandu munisípiu Covalima ne’e apelu ba membru sira atu servisu ho profesionalizmu, no halo tratamentu ba povu ho dignu.
Entretantu komandante PNTL munisípiu Covalima sesante Superintendente António Maria de Sá ne’ebé hetan mudansa ba lideransa, konsege asume knar hanesan komandante ba komandu munisípiu Covalima durante tinan rua-resin hafoin koloka fali ba munisípiu Baucau iha loron 30 fulan Dezembru 2021.(*)
