KFP Nomea Domingos Gusmão Lidera Servisu Agrikultura Covalima

Diretór sesante, Zeferino Amaral Guterres (faru metan) enteraga hela dokumentu ba Diretór atual, Domingos Gusmão (faru mutin), segunda (31/01). Foto Tempotimor

Tempotimor (Covalima)-Komisaun Funsaun Públiku (KFP) hasai desizaun ho númeru 40565/22/PCFP nomeia Domingos Gusmão asumi kna’ar nu’udar Diretór Servisu Agrikultura Munisípiu Covalima.

Diretór Sesante Servisu Agrikultura Munisípiu Covalima,   Zeferino Amaral Guterres entrega ona dokumentu ba Diretór atual Domingos Gusmão hodi lidera Servisu Agrikultura  Covalima.

“Entrega servisu ba ita nia Diretór atual, Domingos Gusmão, ita hamutuk hadi’a servisu diak liu tan hodi dezenvolve setór Agrikultura, ne’ebé durante tinan ualu nia laran iha ha’u nia mandatu hamutuk ho funsionáriu sira halo no buat balu ne’ebé la konsege halo, ita entrega ba Diretor foun ho ita kontinua realiza,” dehan Diretór Sesante, Zeferino Amaral Guterres iha Samfuk, Suku Camanasa, segunda (31/01).

Nune’e, atual Diretór Servisu Agrikultura Munisípiu Covalima, Domingos Gusmão husu ba funsionáriu sira hamutuk hanoin lisuk hodi dezenvolve Servisu Agrikultura Covalima.

“Hau nia prezensa iha ne’e, atu kontinua servisu ne’ebé Diretór sesante ho ita boot sira halo ona, la’os halo buat foun, ha’u husu ita hamutuk ka unidu hodi haree no hadi’a setór Agrikultura Covalima,” nia afirma

Enkuantu sekretáriu Administrasaun Munisípiu Covalima, Fransisco de Jesus Alves husu atu kontinua servisu hamutuk ho Diretór sesante hodi rezolve problema ne’ebé povu Covalima hasoru.

“Ohin mak foin entrega kna’ar ba nia, ne’ebé hatudu tiha rezultadu mak hato’o parabens, ha’u nian mak husu atu kopera hamutuk ho Diretór sesante, nune’e bele rezolve buat balun ne’ebé durante ne’e, la konsege halo,” nia husu. (*)

Related posts