Deskonfia Mosu Diskriminasaun UKL Iha Fatululik

Inan Faluk Adelina de Lima ho nia uma. Domingu (20/02). Foto Tempo Timor

Tempotimor (Covalima)-Deskonfia ekipa verifikadór ba dadus Uma Kbi’it Laek (UKL) iha postu administrativu Fatululik hamosu diskriminasaun ba komunidade iha suku Taroman, tanba rejistu ba ema ne’ebé sei joven no uma di’ak mak rejistu ba UKL inklui deskonfia hili husi partidu.

Ba kestaun ne’e Inan Faluk, Adelina de Lima (50) ne’ebé hela iha aldeia no suku Taroman triste no hamonu matan-been bainhira dadalia ho jornalista www.tempotimor.com tanba kondisaun uma ne’ebé nia hela la merese ona atu hela, maibé ekipa komisaun ba UKL la liga inan faluk ne’e.

Read More

“Ha’u-nia uma ne’e ha’u tauk tebes bainhira udan no anin boot, entaun ha’u labele toba, tanba uma nia rin sira dodok hotu ona, tanba uma ne’e halo iha tinan 1997 ne’ebé nia kondisaun uma ne’e labele hela to’o tinan ida ona, ha’u hodi kalen at mak taka kuak sira iha didin sira ne’e, tanba didin dodok hotu ona. Tanba iha tinan kotuk hirus malu ho sira, tanba ne’e sira lakohi tau ha’u-nia naran hodi hetan Uma Kbi’it Laek ne’e,” konta Inan Faluk Adelina ba www.tempotimor.com iha rezidénsia ne’ebé lokaliza iha aldeia Taroman, Domingu (20/02).

Inan faluk ne’e hatutan, ba kondisaun uma nian ne’e hato’o ona ba ekipa Programa Nasionál dezenvolvimentu Suku (PNDS) iha munisipiu Covalima, maibé to’o agora ekipa PNDS seidauk halo identifika ba kondisaun uma nian.

“Ha’u hato’o ona ba PNDS Munisipiu, maibé diretór laiha ne’ebé sira haruka ha’u fila, dehan sira-nia diretór mai mak ekipa atu sa’e mai foto tan ha’u-nia uma, maibé to’o agora sira-nia ekipa ida seidauk sa’e mai haree ha’u-nia uma. Ne’ebé ha’u triste tebes ho ekipa ida la’o iha suku nia hahalok, sira iha suku ne’e mak servisu laloos, ne’ebé husu ba nasionál se bele ba oin sira ida iha suku ne’e labele halo tan hahalok hanesan ne’e, tanba ami ne’ebé mak benar benar uma aat ne’e la hetan, ema ida uma di’ak no sasan kompletu mak rejistu sira-nia naran sira hili malu husi familia uma laran de’it,” Nia esplika ho matawen.

Inan ne’e mós akresenta, molok ne’e xefe ekipa husi postu Fatululik promete ona katak, atu rejista inan faluk ne’e nia uma hodi hetan apoiu husi governu ne’e, maibé ikus mai inan faluk ne’e la tama kategória tanba deskonfia nia veteranus.

“Sira mai pertama husu ha’u-nia kartaun eleitorál nia foto kopia, maibé ha’u-nia kartaun eleitoral seidauk iha, ne’ebé dader de’it ha’u ba foto kopia ha’u nia kartaun eleitoral iha suku Fatululik ho distánsia ne’ebé dook, maibé to’o ikus fali sira dehan ha’u veteranus, ne’ebé labele, maibé ha’u la’ós veteranus, ha’u foin dadaun mak rejistu, ne’ebé ita seidauk hatene loos, depois sira ko’alia ba ha’u katak, ha’u hein uma lisan, maibé ha’u la’ós hein uma lisan, Bin laiha mak ha’u hein temporáriu de’it, sira ko’alia hanesan ne’e to’o ha’u-nia naran laiha. ne’ebé ha’u dalabarak ne’e toba iha ha’u-nia uma oan aat ne’e. ami nia xefe aldeia ne’e atu limpeza servisu ba Mão-de-Obra mós sira la tau ha’u-nia naran,” katak Nia.

Hatán ba kestaun ne’e xefe suku Taroman ne’ebé haknaar aan hanesan xefe ekipa ba UKL, Leonel Asa katak, ekipa la halo diskriminsaun ka haree husi kor partidu, maibé servisu bazeia ba matadalan.

“Informasaun sira hato’o ne’e lalos, tanba ami la’o bazeia ba matadalan ne’ebé husi nasionál fó mai ami no ami intervista tama sai uma no husu tuir mata dalan ne’ebé mak iha,” dehan Xefe suku ne’e.

Entertantu jornalista www.tempotimor.com observa direta katak, ekipa komisaun ne’ebé rejistu atu hetan Uma Kbi’it Laek (UKL) la’ós ema ne’ebé kbi’it laek, maibé realidade ba ema ne’ebé familia kompletu no uma di’ak mak rejistu naran hodi hetan uma (UKL) iha postu administrativu Fatululik.(*)

Related posts