Tempotimor (Covalima)-Maske oitavu governu konstituisionál daualu ne’ebé lidera husi Primeiru-Minsitru (PM), Taur Matan Ruak ne’ebé mai ho polítika katak rekursu umanu importante liu, maibé realidade mak Eskola Ensinu Basika Filiál (EBF) Holpilat liu ona tinan rua maibé eskola refere didin de’it ho au-baluk.
Ba kestaun ne’e, Koordenadór EBF Holpilat, João Baptista Cardoso husu ba Ministru Edukasaun Juventude no Desportu (MEJD), Armindo Maia atu hola médida lalais ba kondisaun eskola refere, tanba tempu udan alunus haris udan mak aprende iha aula laran.
“Eskola ne’e ami-nia alunus mak lori au mak ami hodi taka janela sira ne’e, tanba eskola ne’e halo hotu anin maka’as vidru monu hotu, entau udan husi ne’ebá mai alunus bokon ami mós hanorin ladi’ak,tanba anin lorin udan maka’as,” dehan Koordenadór EBF ne’e, Segunda (21/02).
Nia afirma, EBF Holpilat la’ós problema de’it didin eskola, maibé menus mós fasilidade hanesan meza no armáriu hodi rai livru.
“Ami nian ne’e menus meza, ne’ebé meza ne’e ami na’in mak halo de’it, ne’e mak foin meza ida ka rua ne’e iha ne’e, ne’e mós agora dodok hotu ona, ne’ebé ami husu ajuda taka janela ne’e, nomós apoiu meza no armáriu, tanba livru sira ne’e nia fatin laiha no importante mós halo muru haleu eskola, tanba ami-nia alunus sira kuda aifunan, maibé animal sira mai estraga hotu, tanba muru eskola laiha nomós sintina públiku la funsiona ona, tanba bee laiha, ne’ebé alunus no profesór kabun moras ne’e halai hotu ba ailaran,” katak Nia.
Liga ba fasilidade sira ne’ebé eskola infrenta, mak Koordenadór EBF Holpilat halo ona proposta ba Edukasaun Munisípiu, maibé to’o agora la iha responde ruma.
“Ha’u hato’o ona dala-haat ka dala-lima ba edukasaun munisípiu no inspetór mos haree direta, maibé to’o agora kondisaun eskola nafatin hanesan ne’e,” Nia informa.
Iha sorin seluk reprezentante estudante EBF Holpilat, Santarosa de Araújo sente triste tanba menus fasilidade meza no tempu udan tur iha sala ladi’ak, tanba anin no udan boot.
“Ami triste tebes, tanba tinan barak ona mak ami aprende ladun di’ak iha tempu udan, tanba anin lori udan tama ba eskola entaun ami bokon nomós ami-nia haris-fatin ladi’ak, ne’ebé ami atu sintina tenke tama du’ut laran, ne’ebé ami husu se bele halo sintina ho ami-nia eskola tenke di’ak,” subliña estudante Santarosa.
Entertantu estudante ne’ebé dadaun ne’e hala’o estudu iha EBF Holpilat hamutuk atus-ida-resin-neen no profesór permanente na’in lima kontratu na’in rua.(*)
