Tempotimor (Covalima)-Tuir Diretora Servisu Saúde Munisípiu Covalima (SSMC), Maria Fátima Moniz katak, durante fulan rua ne’e Covalima rejista ona moras denge ba labarik tinan sanulu mai kraik, hamutuk sianulu.
“Covalima durante fulan janeiru no fevereiru hamutuk 90, labarik sira ne’ebé afeta husi dengue ne’e maioria tinan sanulu mai kraik,” Hateten Diretora Maria ba jornalista sira iha knaar fatin, Horseik (26/02).
Diretora ne’e salienta, to’o agora moras denge ne’ebé rejista iha Covalima konsege hamate ona labarik na’in haat no dadaun ne’e na’in 10 kontinua baixa iha ospitál no na’in 76 konsege rekopera ona husi infesaun ne’e.
“Komunidade ne’ebé afeitadu ho dengue mak komunidade iha suku Camanasa, aldeia Ailok-laran no Suailoro aldeia Sukabilaran, postu Suai nian no Suku Ogues parte postu Maucatar, Salele parte postu Tilomar nomós inklui postu administrativu Zumalai, nune’e ekipa hodi ona aimoruk ba rega iha komunidade sira-nia bairro ka uma hodi hamate susuk,” informa nia.
Nia husu ba komunidade Covalima nafatin mantein uza moskiteiru hodi prevene moras dengue ne’e.
Entertantu moras denge ne’ebé kontinua aumenta iha Covalima, maka Servisu Saúde Munisípiu Covalima (SSMC) servisu hamutuk ho autoridade lokál no sosiedade sivíl sira hanesan Centro Comunidade Covalima (CCC) no Cruz Vermelha de Timor-Leste (CVTL).(*)
