OJE 2022 ba Covalima Hamutuk Millaun $3.6

Autoriedade Covalima prepara no diskute hela kona-ba alokasaun orasamentu ba ka setorais sira, iha salaun Administrasaun Munisipiu Covalima nian, Segunda (17/01). Foto Tempo Timor

Tempotimor (Covalima)-Orsaméntu Jeral Estadu (OJE) tinan fiskál 2022 ne’ebé hetan ona promulgasaun husi Prezidente Repúblika (PR), Francisco Guterres Lu-Olo iha loron 1 Janeiru 2022, mak governu liuhusi Ministériu Administrasaun Estatál atribui ona millaun $3.6 ba munisípiu Covalima.

Ba jornalista sira, Diretór Finasas munisípiu Covalima, Aniceito Amaral hateten, total husi orsaméntu ne’e sei investe ba programa 11 no sub-programa 32 inklui ho aktividade seluk hamutuk 62.

Read More

“Total orsamentu tinan fiskál 2022, administrasaun munisípiu Covalima ne’e hetan alokasaun millaun $3.6, ida ne’e maka sei investe ba iha programa 11, sub-programa 32 inklui atividade 62,” dehan Diretór Finansas iha Salaun administrasaun munisípiu Covalima bainhira hala’o enkontru ho Diretór servisu Munisipál sira, Segunda (17/01).

Nia fundamenta, servisu munisipál sira tenke hatene alokasaun orsamentu ba tinan 2022, atu nune’e sira bele ezekuta tuir planu ne’ebé traxa tiha ona.

“Servisu munisipál ida-idak tenke hatene ninia alokasaun orsamentu ba tinan 2022 nian, atu nune’e iha implementasaun ne’e sira bele hatene ona katak ba atividade ida ne’ebé tau iha planu asaun anual ba tinan 2022 nian sira bele ezekuta tuir planu sira ne’ebé traxa tiha ona,” katak Aniceito.

Iha fatin hanesan Administradór Munisípiu Covalima (AMC), Francisco de Andrade husu ba diretór servisu munisipál sira atu halo planu ida di’ak hodi ezekuta orsaméntu ho lolos no labele deskonfia malu.

“Iha diskusaun orsaméntu ida ne’e ida-idak tenke hatene loloos ninia orsamentu ba tinan ne’e hira, depois imi tenke halo planu ida ne’ebé di’ak, atu nune’e ezekusaun ne’e bele la’o, depois ezekuta karik labele sala no labele deskonfia malu, dalaruma ema ida ne’ebé kaer osan ita ko’alia bebeik iha nia kotuk ne’e ladi’ak,” dehan Francisco.

Entretantu administrasaun munisípiu Covalima hahú fó ona oportunidade ba servisu munisipál sira atu halo pedidu, hodi nune’e halo pagaméntu ba atividade sira ne’ebé traxa ona ba tinan 2022.

Alende ne’e, orsamentu ne’ebé governu aprezenta ba Parlamentu nasionál iha 15 outubru 2021 hamutuk billaun $1,675.000.000. maibé iha prosesu diskusaun no debate iha generalidade to’o final global, PN aprova falo OJE 2022 nian hamutuk billaun $1.1,949.043.291, tanba deputadu sira aprova proposta foun liu 100 durante diskusaun especialidade, nune’e OJE refere aprova besik ba billaun rua.(*)

Related posts