Halerik Buka Aimoruk Oho Peste Batar La iha, Komunidade Uza Aimoruk Tradisionál

Batar iha toos laran, iha suku Debus, Postu Suai Vila Municipiu Covalima, tersa (9/2). Foto Tempo Timor.
Batar iha toos laran, iha suku Debus, Postu Suai Vila Municipiu Covalima, tersa (9/2). Foto Tempo Timor.

Tempotimor (Covalima)-Komunidade aldeia Ahinarai Suku Debus, Postu Administrativu Suai Munisípiu Covalima, hahú uza aimoruk tradisionál Ahuk Desan, Mantega no Lis Asu hodi duni sai ular ka peste ne’ebé invede dadaun komunidade nia batar.

Tuir komunidade Armindo Barros (64) husi Aldeia Ahinarai Suko Debus katak, tanba laiha aimoruk husi governu atu duni peste batar nian, entaun komunidade sira uza aimoruk tradisionál hodi hamate no duni peste ka ular iha to’os laran.

Read More

“Ahuk desan ne’e ami tau iha batar nia dikin no aimoruk seluk hanesan lis mutin ne’e tuku halo dodok, depois tau ba mantega no bee hodi rega iha batar nia hun no ninin sira hodi bolu nehek pata tata mate no duni sai peste sira husi batar laran,” dehan Armindo ba www.tempotimor.com iha nia to’os fatin, Tersa (9/2).

To’os na’in ne’e triste tebes, tanba to’os hektar ida ne’ebé nakonu ho barat, maibé hektar sorin ular han hotu ona.

“Ha’u triste tebes,tanba aihan ne’e komesa menus,tamba ular estraga hotu, agora ami moris ho to’os, entaun husi situasaun ne’e rai hamlaha ne’e ami araska ona, sorte estensionista sira mós fó hanoin mai ami, lae ami nia batar ular han hotu kedas,” Katak Nia.

Haree ba preokupasaun komunidade nian ne’e xefe suku Debos Agostinho da Silva (57) dehan, batar sira ne’e la’ós de’it ular mak estraga batar de’it, maibe anin mós estraga batar barak iha komunidade nia to’os.

“Komunidade nia preokupasaun ne’e, ha’u hato’o ba estensionista, entaun estensionista mós mai kedas, ami na’in rua enkontru ho komunidade no fó hanoin ba komunidade sira kona-ba aimoruk tradisionál hanesan Ahuk desan, mantega sira ne’e atu duni sai ular ka peste ne’ebe han batar,” Nia hateten.

Nia mós dehan, durante ne’e estensionista sira mós vizita direta komunidade sira nia to’os ne’ebé peste ataka batar iha to’os laran, Maibe estensionista sira fó hatene de’it ba komunidade sira, haruka komunidade sira uza de’it aimoruk tradisionál hodi duni sai peste ne’ebé ataka batar.(*)

Related posts