Orsamentu ba SAS Covalima La Sufisiénte, Mákina Bee Kontinua Avaria

  • Whatsapp

Tempotimor (Covalima)-Haree ba Orsamentu Jerál Estadu (OJE) tinan fiskál 2021 ne’ebé governu prevé ba Servisu Bee no Saneamentu (SAS) Munisípiu Covalima ne’ebé la sufisiénte, maka SAS Covalima labele halo manutensaun ba mákina bee ne’ebé durante ne’e avaria hela.

Tuir Diretór Servisu Bee no Saneamentu (SAS) Munisípiu Covalima Moisés Lutamau Vicente (56) katak, komunidade iha Munisípiu Covalima pursentu 86% mak asesu ona bee-moos inklui establese ona sistema iha covalima, maibe iha Postu Administrativu Zumalai, Fatumea no Maucatar mak sei avaria to’o agora.

Read More

“Iha postu lima mak asesu ona bee-moos ho di’ak hanesan Postu Fatumea, FatuLulik, Tilomar, Fohorem no Suai Villa, maibé postu administrativu Zumalai parte Webaba, Harekain mak seidauk asesu bee-moos, tanba iha Webaba Mákina Avaria, ih Suai Villa mós parte Haemanu ho Samfuk no postu Maucatar parte Matai, Holpilat no Manulor mós mákina avaria hotu. Entaun seidauk asesu bee-moos ho di’ak,” dehan Diretór SAS ne’e ba www.tempotimor.com iha nia knaar fatin Suai, Segunda (8/2).

Nia afirma, SAS Covalima mós laiha orsamentu atu halo reablitasaun ba mákina ne’ebé avaria ona, tanba nia kuantidade boot, tanba ne’e labele halo manutensaun ba mákina sira ne’e.

Diretór ne’e akresenta, dzafiu ne’ebe parte SAS Munisípiu Covalima infrenta mak laiha orsamentu ba manutensaun, laiha tékniku espesialista atu hadi’a mákina ne’ebe avaria.

“Ha’u relata bei-beik liuhusi proposta ba diresaun nasionál sira, iha tempu enkontru nasionál mós ha’u alerta iha ne’ebá kona-ba mákina avaria no tékniku espesialista ba bomba bee-moos ne’e, maibé laiha responde husi diresaun nasionál to’o agora,” katak Nia.

Entertantu Diretór SAS Covalima ne’e husu ba komunidade sira uza mákina ne’ebé estadu hari ona ho kuidadu no tau matan ba mákina sira inklui uza ho konxiénsia.

“Komunidade sira uza mákina sira ne’e ho kanxiensia no konsidera hanesan ita-nia rasik, atu nune’e, iha problema ka avaria ruma, komunidade rasik mak hadi’a ka halo manutensaun ho folin ne’ebé ladun boot, tanba presiza uza ho kuidadu, tanba tékniku espesialista iha Covalima laiha,” Nia afirma.(*)

Related posts