Tempotimor (Covalima)-Molok fulan Abril remata, Lafaek hakanek no hamete ona ema na’in rua iha Suai inklui ohin dader lafaek hakotu tan Nazária Barros (4) hafoin fase bika iha mota Wedare.
Tuir xefe aldeia Sanfuk António Arcanjo katak, ohin lafaek tata Nazária Barros (4) maizumenus tuku 12:15 iha to’os besik mota ninin.
“Horseik akontesimentu ne’e iha lokraik matebian hamutuk ho nia avo mane, sira han hotu depois ba fase bikan iha mota laran, entaun nia avo mane kuru bee hela iha mota laran, matebian hamutuk ho nia bin na’in rua iha mota ninin besik to’os , derpenti deit lafaek mai husi ne’ebé derpente de’it tata nia-ain hodi rasta matebian, entaun nia bin hakilar bolu nia apa, nia apa halai mai tuku Lafaek nia inus dala tolu mós labele salva, tanba lafaek dada ba mota laran, entaun nia avo mane telfone nia apa ama iha to’os sorin entaun mai mos la konsege salva nia vida,” dehan xefe aldeia ne’e ba www.tempotimor.com, Kuarta (28/4)
Iha situasaun hanesan, reprezentante família husi matebian Tome Moniz Magno sente triste tebes, tanba lakon oan ida ho maneira ne’ebé lafaek mak tata, entaun sei halot tuir kultura suku Kamnasa nian.
“Triste tebes ho matebian Nazária Barros tanba lakon derpente de’it iha ami leet, ne’ebé Maromak mak hadomi no bolu ona nia, nia distinu mak hanesan ne’e ona, buat hotu ita la espera tanba nia distinu mak hanesan ne’e ona, dalan ikus mak ami família halot tuir kultura ami nian,” hateten familia.
Apende ne’e lafaek mós iha semana kotuk hakanek no hamate ona ema ida ne’ebé hamutuk ho Nazária Barros hamutuk na’in tolu ona, ne’ebé na’in ida konsege sala aan husi lafaek, maibé na’in rua seluk tenke mate iha fatin.
Entertantu akontesimentu ne’e akontese iha postu administrativu suai munisipiu Covalima no familia promete iha tempu badak sei halo tuir kultura no halo lulik sira iha suku Suailoro, nune’e labele akontese tan ona.(*)
