Tempotimor (Covalima)-Organizasaun Uniaun Nasionál Juventude Maubere (UNIJMA), CPD-RDTL, Fretilin Movimentu iha munisípiu Covalima deklara apoiu kandidatu Prezidente Repúbliku (PR) Francisco Guterres “Lu Olo, iha eleisaun prezidensiál ba segunda volta.
“Ha’u nu’udar komisáriu politíku iha setór III alerta ba membru hotu iha organizasaun UNIJMA ativista Pro-RDTL hahú husi idade 17 ba leten hakarak ka lakohi tenke apoiu ba Francisco Guterres “Lu Olo” liuhusi votus iha eleisaun segunda volta,“ dehan Portavoz UNIJMA Covalima, Rosalino Cardoso ba jornalista sira liuhosi konferénsia imprensa, ne’ebé realiza iha suku Matai, postu administrativu Maucatar, Horseik (06/04).
Liuhusi apoiu ne’e atu fó vitória ba kandidatu ho númeru sorteiu 2, atu re-eleitu fali ba mandatu daruak husi periodu 2022 to’o 2027.
“Mai ita ida deit tanba úniku Fretilin mak moris iha Timor-Leste hodi liberta patria no liberta povu, se lori kandidatu Francisco Guterres Lú-olo ba Aitarak laran iha tinan 2023 sei hetan dezenvolvimentu iha ita-nia rai laran,” Nia deklara.
Portavoz ne’e afirma, atu lori Lu Olo fila ba Aitarak laran, iha baze tenke esplika ba povu hodi povu labele lori propaganda falsu sira, nune’e tenke kaer metin Freitilin.
“Ha’u-nia mensajen ba imi hotu liuhusi ita-nia dor-to-dor ita prontu atu la’o hamutuk, se ita la hamutuk ha’u hanoin susar tebes. Iha rejiaun Covalima sentru hamutuk 32, entaun ita presija koopera malu hodi fó vitória ba kandidatu prezidente repúbliku Francisco Guterres Lu Olo,” Nia hateten.
Iha sorin seluk, Adjuntu Sekretáriu Jerál Fretilin, Flávio Maria Guterres da Silva katak, organizaun UNIJMA servisu hamutuk luta liberta povu, hodi hasai povu husi nakukun.
“Ita hamutuk halo servisu luta dala ida tan hodi hasoru lia anin atu liberta povu ho loloos hodi hasai povu hosi nakukun, bainhira povu esklaresidu ema seluk labele manipula ona tenke servisu maka’as hodi hasai povu husi nakukun laran,” nia reforsa.
Povu nia direitu sivíku, politíka importante, bainhira povu atu ezerse nia direitu, povu tenke hatene loloos dalan ne’ebé di’ak ba povu.
Enkuantu bazeia ba kalendáriu ne’ebé fó sai husi Komisaun Nasionál ba Eleisaun (CNE), kandidatu prezidente Repúblika hahú realiza kampaña eleitorál ba eleisaun segundu volta, hahú iha loron 2 fulan Abril ne’ebé sei remata iha loron 16 fulan Abril tinan nee. Ho nune’e, eleisaun prezidensiál ba segundu volta sei realiza iha loron 19 fulan Abril tinan nee.(*)
