Autoridade Covalima Kontinua Disemina Prevensaun Covid-19

Administrador Munisipiu Covalima ho komandante PNTL Covalima halo sensebilizasaun iha merkadu sentral kona-a prevensaun Covid-19, sabadu (07/05). Foto Suplay

Tempotimor (Covalima)-Pandemia Covid-19 ne’ebé kontinua da’et ba populasaun iha Timor-Leste ne’ebé atinje ona ema rihun 3.111 no pasiente Covid-19 iha munisípiu Covalima hamutuk na’in 54 mak autoriedade sivíl no seguransa iha Covalima kontinua halo kampaña kona-ba prevensaun Covid-19 iha komunidade nia leet.

Atividade kampaña ka sensibilizasaun ne’ebé lidera husi Administradór munisípiu Covalima, Francisco de Andrade no Komandante PNTL no F-FDTL postu Tilomar no Diretór saúde munisípiu Covalima ne’e realiza iha merkadu sentrál ladi, suku Camanasa postu administrativu Suai.

Read More

Iha momentu ne’e Komandante PNTL Munisípiu Covalima, Superentendente Polísia António Maria de Sá husu ba negosiante hotu kontinua kumpri protokolu ne’ebé mai husi Organizasaun Mundiál ba Saúde (OMS) no Ministériu Saúde (MS)

“Husu ba ita hotu ne’ebé agora dadaun iha merkadu, nafatin kumpri regras OMS no Ministériu Saúde nian,” dehan Komandante António hafoin halo kampaña ba prevensaun Covid-19 iha merkadu sentrál Ladi, Sábadu (8/5).

Iha tempu hanesan, Administrdor munisipiu Covalima Fransisco de Andrade alerta ba povu atu kumpri nafatin sirkular ne’ebé mai husi Sentru Integradu Jestaun Krize, Sala Situasaun (SIJK-SS) katak, asuntu ne’ebé la importante hotu-hotu tenke hela iha uma.

“Informasaun ne’ebé mai husi SIJK-SS, ita nafatin kumpri regras organizasaun mundiál ba saúde no MS ne’ebé husu ita hotu tenki kumpri regra, atu sai ba fatin ruma tenke ho asuntu ne’ebé importante ka nesesita duni ba imi, se la importante, ida-idak hela iha nia uma hodi kumpri nafatin protokolu husi OMS,” informa Administradór ne’e.

Entertantu iha atividade kampaña ne’e ekipa saúde munisípiu Covalima mós kontinua korajem ba Covalimaoan sira atu hola parte iha prevensaun Covid-19 nian liuhusi halo swab test, nune’e bele identifika virus, tanba kapitál Dili kategória ona ba transmisaun komunitáriu.

Alende ne’e, populasaun Covalima ne’ebé afeta ona ba Covid-19 hamutuk na’in 54 ne’ebé na’in 18 rekopera ona no na’in 36 kontinua baixa iha izolamentu bazeia ba dadus loron 7 maiu 2021 nian.(*)

Related posts