Tempotimor (Covalima)-Diretór Servisu Solidariedade Sosiál Inkluzaun (SSSI) Munisípiu Covalima, Agapito Assis Cardoso hateten, durante pandemia COVID-19 iha Timor-Leste, liu-liu Covalima, Ministériu Solidariedade Sosiál Inklusaun (MSSI) apoiu fos rihun hitu resin ba família vunerável sira.
“MSSI aloka fos mai Servisu Solidariedade Social Covalima hamutuk rihun 7,180 hodi hatán ba komunidade sira husi postu administrativu 7 iha munisípiu Covalima, ne’ebé afeita ba COVID-19,” dehan Diretór SSSI ba jornalista sira iha nia knaar fatin, Tersa (04/01).
Diretór ne’e salienta, ba tinan 2021 husi fulan janeiru to’o dezembru SSSI Covalima apoiu dala haat kada trimestre ba família vulnerável sira.
“Tinan 2021 ba trimestre dahuluk distribui fos hamutuk rihun 1,835 ba trimestre daruak rihun 1,229, ba trimestre datoluk nian rihun 2,371 no ba trimestre dahaat rihun 1,744. Ida ne’e mak ita distribui total fos saku rihun 7,180 ba asistensia sosiál ba vunerável sira iha Covalima,” Nia informa.
Entertantu apoiu ne’e ba instituisaun solidariedade sosiál, ba Ema ho Defisisiente no vunerável, vítima no ferik katuas abandonadu inklui labarik sira liliu ba ema vunerável ne’ebé hahan la iha.(*)
