Tempotimor (Covalima)-Esforsu governu ne’ebé atu proteze povu liuhusi vasina AstraZeneca, maka dadaun ne’e ekipa saúde munisípiu Covalima tama sai suku no aldeia sira iha Covalima, hodi foti dadus ba ema ho idade 60 ba leten inklui ema ne’ebé moras.
Husi dadaus ne’ebé ekipa rekolla husi Aldeia no suku sira iha postu administrativu hitu ne’ebé pertense ba munisípiu Covalima hamutuk rihun 10.803.
Tuir diretór diresaun servisu saúde munisipiu Covalima, Filipe Perreira Lemos katak, dadus husi Postu Administrativu hitu ne’ebe ema ho idade 60 ba leten hamutuk 4.958 no ema ne’ebe maka ho moras 5.845.
“Dadus ne’ebé agora dadauk tama iha Servisu Saúde Munisipio Covalima maka, Ema idade 60 ba leten hamutuk, 4.958 kompostu husi Feto 2.676, Mane 2.282 no ba ema ne’ebe maka ho moras ne’e hamutuk 5845 kompostu husi Feto 2.906 no Mane 2.939 ida ne’e maka dadus provizóriu hodi prepara halo pedidu para simu vasina,” dehan Diretor Filipe ba www.tempotimor.com iha nia knaar fatin, Tersa (25/5).
Diretór ne’e hatutan, ekipa SSMC koantinua rekolla dadus ba funsionáriu sira iha Covalima. Maibé ekipa mós prepara ona pedidu bazeia ba dadus ne’ebé iha ona.
“Ami prepara ona pedidu bazeia ba dadus ne’ebé maka iha, maibé ami sei hein tan loron ida ka rua, tamba iha orientasaun katak funsionáriu sira mós tenke simu hotu vasina, entaun presiza ami foti dadus mós husi sira, tamba ne’e maka ami informa ona ba diretór servisu munisipál sira, atu entrega dadus mai ami, nune’e ita bele halo planu preparasaun ba pedidu vasinasaun nian,” katak Nia.
Entertantu loron atu fo vasinasaun ba ema sidadaun sira ne’e seidauk fixu, tanba ekipa SSMC kontinua rekolla dadus funsionáriu sira nian.(*)
