Komunidade Covalima Hadau Malu Kartaun Simu Osan

Veteranus no Funsionáriu sira ne'ebe sena malu hela iha portaun BNU Suai oin atu foti kartaun simu osan nian, tersa (25/05). Foto Tempo Timor

Tempotimor (Covalima)-Iha loron 25 Fulan-maiu tianan 2021, parte dader maizumenus tuku 06:00 oras Timor-Leste, funsionáriu, veteranus lubuk ida forma no hobur iha portaun Banku Nasionál Ultramarinu (BNU) Suai, hodi hadau malu kartaun simu osan nian.

Ba situasaun ne’e, komunidade Angelina de Jesus (56) sente triste, tanba atendimentu BNU nian ladun di’ak inklui obrigadu komunidade sira tenke hobur no hadau malu.

“Agora ami ne’ebé mak ohin la simu númeru kartaun simu osan nian ne’e fila de’it ona, tanba hein to’o lokraik mós ami la foti osan, tanba ema ne’ebé mak forte, entaun hadau kartaun iha seguransa sira hodi bele simu osan, maibé ami ne’ebé mak ferik ne’e hein to’o lokraik mós la haruka ami tama ba banku laran foti ami-nia osan,” dehan Angelina ba www.tempotimor.com iha resintu BNU Suai, Tersa (25/5).

Nia afirma, funsionáriu sira di’ak, tanba iha ATM, maibé mártires no veteranus balun la hetan kartaun ATM só uza de’it konta bankária.

“Ami ne’ebé mak uza rekening ne’e fulan hanesan ne’e hela de’it, forma dudu malu to’o sama tan ami, ami nia maluk balun to’o monu, ami atu urus ATM, sira husi banku dehan ami tinan boot ona ne’e labele urus ona ATM,” informa Nia.

Entertantu to’o notísia ne’e públika ekipa www.tempotimor.com seidauk komfirma ho parte BNU, tanba okupadu hela ho servisu. (*)

Notisia seluk