Tempotimor (Covalima)-Hafoin governu liuhusi Konsellu Ministru (KM) deside aplika serka sanitária iha munisípiu Covalima, mak Polísia Nasionál Timor-Leste (PNTL) liuhusi sesaun tranzitu hatama rekolla no hatama reseita dollar $351 ba kofre estadu.
“Iha fulan Abril tinan ne’e PNTL munisípiu Covalima liuhusi diresaun tranzitu hatama reseita hamutuk $351 dollar amerikanu, tanba sidadaun barak mak la hatama osan bainhira ami fó resibu ba sira hodi ba selu iha banku, liuliu mak sidadaun ne’ebé uza transporte hanesan motorizada,” dehan Komandante Trázitu Munisípiu Covalima, Sarjentu Xefe Patrício de Jesus, Kuarta (26/5).
Nia afirma, parte sesaun tranzitu munisípiu Covalima mós fó toleránsia ba sidadaun sira ne’ebé utiliza transporte públiku, tamba iha hela serka sanitária.
“Parte ida mós ami hanoin ba ita-nia sidadaun sira ne’ebé lori transporte públiku iha munisipiu Covalima, tanba ita Covalima serka sanitária, ne’ebé komunidade barak mak laiha osan hodi selu ba sira-nia dokumentu ne’ebé durasaun validade liu ona,” katak Nia.
Entertantu, durante fulan-Abril Polísia Unidade Transitu Covalima prende motorizada hamutuk 38, kareta baskolate neen nomós kareta marka estadu ida, nune’e husi transporte sira ne’e mak selu koimas hodi hatama ba kofre estadu.(*)
