Tempotimor (Covalima)-Liga ba kazu omesidu ne’ebé deskonfia involve husi membru Unidade Polísia Marítima (UPM) na’in neen ne’ebé oras ne’e dezarmadu no kumpri hela oras 72 iha sela Komandu Jerál Polísia Nasionál Timor-Leste (PNTL) Munisípiu Covalima hein de’it minutu hodi ba hatán iha Ministériu Públiku (MP).
Tuir Komandante PNTL Munisípiu Covalima, Superintendente Polísia Basílio de Jesus katak, oras ne’e membru UPM na’in neen ne’e kumpri hela regras oras 72, depois de remata kontinua kedas ba Ministériu Públiku.
“Relasiona ho kazu ne’e iha prosesu nia laran, ne’ebé Ministériu Públiku hanesan na’in ba prosesu hot-hotu, PNTL iha ligasaun ho MP, ita halo ona detein ba ema ne’ebé ita deskonfia hanesan suspeitu iha komandu munisípiu Covalima hodi hein husi Ministériu Públiku, bainhira termina ona oras 72, tama ona iha prosesu judisiál,” dehan Komandante PNTL Covalima, Basílo ba www.tempotimor.com liuhusi via telefone, Tersa (25/01).
Relasaun ho kazu omesidu ne’e, komunidade Covalima moris iha situasaun hakmatek no kontroladu.
“Situasaun iha Covalima kontroladu, einjeral situsaun normal e tantu família husi matebian horseik lori mate isin halo otopsia iha Dili, fila mai ona Covalima hori kalan iha ona mate uma. Ne’ebé husi horikalan to’o agora situsaun hakmatek,” Nia informa.
Entertantu kazu omesidu ne’e akontese iha Suailoro, postu adminstrativu Suai iha Domingu (24/01/2022) madrugada ne’ebé Julio Amaral lakon vida no Marcos Amaral ho Cristina Amaral hetan mós torturasaun husi oknum membru UPM sira ne’e.(*)
